Bógetterdiń qurylysy sel tasqynynan bolatyn qaýipti barynsha azaıtýǵa múmkindik beredi.
Úlken Almaty men Aqsaı ózenderi shatqaldarynda selge qarsy bógetter ornatylyp jatyr, dep habarlaıdy Almaty-akshamy.kz Tótenshe jaǵdaılar mınıstrliginiń saıtyna silteme jasap.
Almaty qalasynyń bıik taýly aımaǵynda «Úlken Almaty», «Aqsaı», «Qarǵaly» jáne «Kishi Almaty» dep atalatyn 146 muzdyq, 50-den astam muzdaq-muzdyq kól bar.
Almaty qalasy TJD baspasóz qyzmetiniń aqparatyna sáıkes, sel qaýipsizdigin qamtamasyz etý úshin Úlken Almaty jáne Aqsaı ózenderiniń baseınderinde seldi ustap qalatyn eki bógettiń qurylysy júrip jatyr. Osy ózenderdiń joǵary jaǵynda sel qaýpi bar 116 ýchaske, 114 muzdyq, 35 muzdaq-muzdyq kólder bar, onyń 9-ynda jarylys qaýpi bar.
Naýryzbaı aýdanyndaǵy Aqsaı ózeninde de seldi ustap qalatyn bógettiń qurylys-montajdaý jumystary júrip jatyr. Aqsaı ózeniniń baseıni Úlken Almaty sıaqty sel júrý qaýpiniń birinshi sanatyna jatady. Bógettiń bıiktigi – 75 metr, selden qorǵaý kólemi – 7 mln tekshe metr.
Seldi ustap qalatyn bógetter qurylysynyń josparly aıaqtalý merzimi – 2023 jyl.
Tótenshe jaǵdaılar departamenti mamandarynyń aıtýynsha, Úlken Almaty jáne Aqsaı ózenderi baseınderiniń sel júrý qaýpi joǵary. Olardyń áser etý aımaǵynda 5 myńnan astam turǵyn men demalýshy, sondaı-aq ońtústik astananyń qonaqtary men qyzmet kórsetýshi personal qalýy múmkin. Sel júrý qaýpi bar aımaqta jazǵy kezeńge aerovızýaldy tekserýler júrgizý kezinde tek Úlken Almaty ózeniniń baseıni boıynsha mamandar úsh myńnan astam avtomashına men 60 avtobýsty eseptedi.
Bógetterdiń qurylysy sel tasqynynan bolatyn qaýipti barynsha azaıtýǵa múmkindik berip, Almaty qalasynyń Bostandyq, Naýryzbaı, Almaly aýdandary men Almaty oblysy Qarasaı aýdanynyń shyǵys bóliginiń halqyn jáne obektilerin senimdi qorǵaýdy qamtamasyz etetin bolady.
Sonymen qatar, halyqty sel qaýpi týraly ýaqtyly habardar etý úshin eki shatqaldyń aýmaǵynda 51 dabyl qurylǵysy ornatyldy.
Almaty qalasy ákimdiginiń belsendi qoldaýymen sońǵy jyldary aldyn alý jumystaryn júrgizý úshin, «Qazseldenqorǵaý» qajettilikterine jergilikti búdjet qarajatynan 2 ekskavator, 10 jyljymaly úı, ónimdiligi joǵary 10 sorǵy, 2 000 metr sıfon qubyry jáne bir jeńil avtokólik satyp alyndy.