Almaty qalasynda «Sport komıteti – Armıa ortalyq sport klýby» kesheninde «Ońtústik» óńirlik qolbasshylyǵyna qarasty áskerı bólimderdiń áskerı qyzmetshileri arasynda qazaq kúresinen chempıonat ótti.
Jarystyń shymyldyǵyn ashqan QR Ulttyq ulany «Ońtústik» óńirlik qolbasshylyǵy qolbasshysynyń orynbasary polkovnık Konstantın Kýatov, QR Qorǵanys mınıstrligi Sport komıteti – Armıa ortalyq sport klýby oqý-jattyǵý ortalyǵynyń bastyǵy maıor Berden Aqpanbekov sportshylarǵa sáttilik tiledi.
Birinshilikke Almaty, Qyzylorda, Shymkent, Taraz jáne Taldyqorǵannan kelgen 9 komandadan 63 balýan qatysyp, úsh kún boıy bozkilemniń shańyn qaqty.
Quqyqtyq tártip áskerinde alǵash ret uıymdastyrylyp otyrǵan bul jarysta sportshylar 7 salmaq dárejesi boıynsha baq synasty. Qazaq kúresinen áskerı bólimderde ótkizilgen birinshilikke jeńiske jetken tájirıbeli balýandar jiberilgendikten, jarys óte tartysty ótti. Ásirese, fınalǵa ótken bozkilem sheberleri jarys kórkin qyzdyra tústi. Osylaısha, jarys jolynda qarsylasyn qapy qaldyryp, aılasyn asyrǵan jeńimpazdar men júldegerler belgili boldy.
Saıys qorytyndysynda jalpy komandalyq birinshi oryndy 6506 áskerı bóliminiń (Shymkent qalasy) komandasy ıelense, ekinshi oryndy 5513 áskerı bóliminiń (Taraz qalasy) komandasy qanjyǵasyna baılady, al úshinshi oryndy 3650 áskerı bóliminiń balýandary (Almaty qalasy) qanaǵat tutty.
Jeke kórsetkishter men komandalyq esepte top jarǵandar Qazaqstan Respýblıkasy Ulttyq ulany «Ońtústik» óńirlik qolbasshylyǵynyń qolbasshysy general-maıor Talapker Ámireevtiń atynan kýbok, medal jáne baǵaly syılyqtarmen marapattaldy.
Aıta keteıik, jarys jeńimpazdary Ulttyq ulannyń aldaǵy ýaqytta naýryz aıynda qazaqsha kúresten Semeı qalasynda ótetin chempıonatyna qatysyp, ońtústiktiń namysyn qorǵaıtyn bolady.