3 naýryzda úshinshi evakýasıalyq ushaqty jiberý máselesi pysyqtalýda.
QR Syrtqy ister mınıstrligi men shet elderdegi mekemeleri Qazaqstan azamattaryn Ýkraınadan evakýasıalaý jumysy bastalǵannan beri 431 azamatqa, onyń ishinde 404 adamǵa Polshaǵa, 21 adamǵa Moldovaǵa, 5 adamǵa Majarstanǵa, 1 adamǵa Slovakıaǵa shyǵýǵa járdem kórsetti, dep habarlaıdy Almaty-akshamy.kz QazAqparatqa silteme jasap.
Qazaqstandyq dıplomattar joǵaryda atalǵan memleketterdiń shekarasynan ótýdi, azamattardy jınaýdy jáne Qazaqstanǵa odan ári jetýdi qamtamasyz etedi.
«Air Astana» áýekompanıasynyń eki evakýasıalyq ushaǵy 299 adamdy shyǵaryp úlgerdi, olar Katovıse qalasynan (Polsha) Almaty men Nur-Sultan qalalaryna jetti.
Sonymen qatar, 3 naýryzda úshinshi evakýasıalyq ushaqty jiberý máselesi pysyqtalýda.
Qazirgi ýaqytta Katovıse qalasynda 68 QR azamaty elge oralatyn sátin kútip otyr.
Buǵan deıin shekarany ótken birqatar azamattar EO aýmaǵynda qalýǵa sheshim qabyldady.
Sonymen qatar, azamattarymyzdy ýkraın-polák shekarasyna jetkizý úshin Kıevten 57 adamǵa jáne Lvovtan 41 adamǵa sapar uıymdastyryldy.
«Atameken» UKP bergen aqparatyna sáıkes, Ýkraınadaǵy áskerı shıelenis bastalǵannan keıin, el aýmaǵynda 47 júrgizýshi – QR azamattary jáne 8 júrgizýshi – shet memleket azamattary bar - jalpy 55 avtokólik qaldy.
Qazirgi tańda qazaqstandyq dıplomattardyń kómegimen 55 avtokólik quraldarynyń ishinen júrgizýshilermen birge 13 avtokólik ýkraın-reseılik shekarasy arqyly Reseı aýmaǵyna, 8 avtokólik Moldovaǵa jáne 3 avtokólik Polshaǵa shyǵýǵa qolǵabys kórsetildi.
Qolda bar derekter boıynsha, qazaqstandyq tasymaldaýshylardyń 31 avtokólik quraly Ýkraına aýmaǵynda qaldy.
Azamattardyń jáne júk tasymaldaýshylardyń ornalasqan jerine baılanysty QR Reseıdegi, Belarýstegi, Polshadaǵy, Slovakıadaǵy, Majarstandaǵy, Rýmynıadaǵy jáne Moldovadaǵy sheteldik mekemeleri olarmen turaqty baılanysta bolýy jáne sol eldiń bıligimen atalǵan aýmaqtar arqyly evakýasıalaýdy pysyqtaýda, sondaı-aq neǵurlym qaýipsiz evakýasıalyq joldardy usynýda.