Osy maqsatta respýblıkalyq jedel shtab qurylǵan.
Qazaqstannyń Aýyl sharýashylyǵy mınıstrligi kóktemgi egis jumystaryna daıyndyqtyń qalaı júrgizilip jatqanyn aıtty, dep habarlaıdy Almaty-akshamy.kz.
Mamandardyń aıtýynsha, 2022 jylǵy egis alqaptarynyń qurylymyn 22,9 mln ga quraıdy dep boljap otyr, bul ótken jyldyń kórsetkishinen 13,5 myń ga artyq.
«2021 jylǵy jeltoqsanda oblys ákimdikterimen ótken keńes barysynda egis alqaptarynyń boljamdy qurylymy talqylanyp, ishki naryqty tolyq tolyqtyrý maqsatynda áleýmettik mańyzy bar daqyldar óndirisin ulǵaıtý qajettiligi aıtyldy. Aýyl sharýashylyǵy taýar óndirýshilerin tuqymmen, agrohımıamen, tehnıkamen, qarjylandyrýmen jáne ózge de kómekpen qamtamasyz etýdiń barlyq máselelerin úılestirý maqsatynda respýblıkalyq jedel shtab qurylyp, onyń quramyna barlyq múddeli organdar men uıymdar, sondaı-aq oblys ákimderiniń orynbasarlary engizildi.
Qazirgi ýaqytta tuqym josparǵa sáıkes 100% toltyryldy, saraptamaǵa 1,5 mln tonna jazdyq daqyldar tuqymy kelip tústi, onyń 1,3 mln tonnasy nemese 90% tekserildi. Tekserilgen tuqym kóleminiń 99% kondısıaly dep tanylǵan, 88% egis standartynyń 1 jáne 2-klasyna sáıkes keledi», - delingen ASHM baspasóz qyzmetiniń habarlamasynda.
Aldyn ala derekter boıynsha, 2022 jylǵy ónimge 135 myń tonna elıtalyq tuqym – 5,7 %, úshinshi reprodýksıadan tómen emes tuqym – 95% sebildi. Egis naýqanyn ótkizý úshin aýyl sharýashylyǵy qurylymdarynda 141,7 myń traktor, 4300 birlik ónimdiligi joǵary egis keshenderi, 73,2 myń tuqym sepkish, 221,2 myń topyraq óńdeý quraly bar.
Respýblıkada bir mezgilde birneshe tehnologıalyq operasıalardy oryndaıtyn qazirgi zamanǵy egis keshenderiniń 4300 birlikten astamynyń bolýy dándi daqyldar alqaptarynyń 70% egýdi júzege asyrýǵa múmkindik beredi.
«Aǵymdaǵy jyly egis jumystaryn júrgizýge óńirlerdiń dızel otynyna qajettilik 400,0 myń tonnany qurady, bul ótken jyly bólingen kólemnen 20,0 myń tonnaǵa artyq. Aıyrmashylyq qardy saqtaý jáne ylǵaldy jabý jumystaryn júrgizý qajettiligine baılanysty boldy», - delingen habarlamada.
Óńirlerdiń qajettiligi tıisti esepteýlermen Energetıka mınıstrligine joldandy.
Aǵymdaǵy jyly mıneraldy tyńaıtqyshtardy engizý kólemi shamamen 695 myń tonnany quraıdy, bul ótken jyldyń kórsetkishinen 70 myń tonnaǵa artyq. Dástúrli túrde satyp alynatyn tyńaıtqyshtardyń 60% 2 túrge-ammıak selıtrasy men amofosqa tıesili, bulardyń óndirisi Qazaqstanda bar.
Aýyl sharýashylyǵy taýar óndirýshilerin atalǵan tyńaıtqyshtarmen qamtamasyz etý maqsatynda otandyq zaýyttardyń basshylyǵymen kelissózder júrgizildi, olardyń nátıjeleri boıynsha ishki naryqty tolyq qamtamasyz etý boıynsha ýaǵdalastyqtarǵa qol jetkizildi.
Kóktemgi egis jumystary bastalysymen mınıstrlik oblys ákimdikterimen birlesip apta saıyn mıneraldy tyńaıtqyshtarmen qamtamasyz etilý monıtorıńin júrgizetin bolady. Olardyń qunyn sýbsıdıalaý maqsatynda aǵymdaǵy jyly 26,8 mlrd teńge qarastyrylǵan.
«2021 jyly kóktemgi egis jáne egin jınaý jumystaryn júrgizýge barlyǵy «Agrarlyq nesıe korporasıasy» AQ 83,8 mlrd. teńge somasyna (onyń ishinde búdjettik kredıt70 mlrd. teńge) 3 myńnan astam aýyl sharýashylyǵy taýaryn óndirýshini nesıelendirip, bul 4,3 mln. gektardy qamtýǵa múmkindik berdi.2022 jyly Agrarlyq nesıe korporasıasy 88,4 mlrd teńge bólýdi josparlap otyr, onyń ishinde búdjettik nesıe 70 mlrd teńge, qalǵany óz qarajaty»,- deıdi mamandar.
Sonymen qatar, 2021 jyldyń jeltoqsan aıynda aǵymdaǵy jyldyń egis jumystaryna daıyndalý úshin 5,1 mlrd teńge somasynda nesıe bólindi. Kóktemgi egis jumystaryna josparlanǵan kredıt shyǵyn normatıvterin arttyrýdy eskere otyryp, 3 myńǵa jýyq ASHTÓ-ni jáne 4 mln gektarǵa jýyq egistikti qamtýǵa múmkindik beredi.