Qazaqstanda elektr kóliginiń sanyn ulǵaıtý yntalandyrylýda
QR Premer-Mınıstri Asqar Mamınniń tóraǵalyǵymen ótken Úkimet otyrysynda ekologıany jaqsartý máseleleri qaraldy. Ekologıa, geologıa jáne tabıǵı resýrstar mınıstri Maǵzum Myrzaǵalıev, Shyǵys Qazaqstan oblysynyń ákimi Danıal Ahmetov, Almaty qalasynyń ákimi Baqytjan Saǵyntaev, Qaraǵandy oblysynyń ákimi Jeńis Qasymbek baıandama jasady, dep habarlady Almaty-akshamy.kz. Premer-Mınıstrdiń saıtyna silteme jasap.
Nur Otan partıasynyń baǵdarlamasyn oryndaý aıasynda 2 mlrd aǵash otyrǵyzý, elimizdiń soltústik óńirlerin gazdandyrý, 6 qoqys óńdeý zaýytyn salý jobalaryn iske asyrýdy bastaý jáne t. b. boıynsha aýqymdy jumystar qolǵa alyndy. Kólik quraldary shyǵaryndylarynyń atmosferaǵa áserin tómendetý úshin qoǵamdyq kólikti gazǵa aýystyrý boıynsha belsendi jumys júrgizilip jatyr. Qabyldanyp jatqan sharalar 2025 jylǵa qaraı 10 qalada atmosferanyń lastaný ındeksin joǵary deńgeıden ortasha deńgeıge deıin tómendetýge jáne jalpy alǵanda, aýa sapasyn jaqsartýǵa múmkindik beredi. Júıeli ekologıalyq problemalardy sheshý maqsatynda úzdik álemdik praktıkalardy eskere otyryp, jańa Ekologıalyq kodeks qabyldandy, onyń elementteriniń biri — iri óndiristerde ozyq tehnologıalardy engizý. Jergilikti atqarýshy organdar jurtshylyqpen birlesip, qorshaǵan ortanyń lastaný deńgeıin tómendetýge, kógaldandyrýǵa, «tarıhı» lastanýlardy joıýǵa baǵyttalǵan Jol kartalaryn ázirlep, bekitti.
Premer-Mınıstr avtoparkti jańartý boıynsha keshendi sharalardy odan ári iske asyrýdy, otyn sapasy men shyǵaryndylar kólemine baqylaýdy kúsheıtýdi, elektr kóligi sanynyń ósýin yntalandyrýdy tapsyrdy.
Úkimet basshysy jaqynda elektromobılderge kádege jaratý alymyn alyp tastaýdy mysalǵa keltirdi. Asqar Mamın Ekologıany jaqsartý boıynsha óńirlik Jol kartalaryn, ásirese, bıyl is-sharalardyń jartysynan azy oryndalǵan Nur-Sultan jáne Almaty qalalaryna oryndaýdy jandandyrý qajet ekenin atap ótti. Úkimet basshysy atmosferaǵa shyǵaryndylardy azaıtý maqsatynda ónerkásiptik kásiporyndar úshin eń ozyq qoljetimdi tehnologıalar boıynsha anyqtamalyqtardy ýaqytyly ázirleýdi tapsyrdy. Indýstrıa jáne ınfraqurylymdyq damý mınıstrligine Ekologıa, geologıa jáne tabıǵı resýrstar, sondaı-aq Qarjy mınıstrlikterimen birlesip, qatty turmystyq qaldyqtarǵa arnalǵan polıgondardyń úlgilik jobasyn ázirleý, ákimdiktermen birlesip, áreket etip turǵan zańnamanyń jańa talaptaryna sáıkes, qurylys polıgondaryn qurý máselesin pysyqtaý tapsyryldy.
Premer-Mınıstr sondaı-aq káriz-tazartý qurylystaryn sanıtarlyq-ekologıalyq talaptarǵa sáıkestendirý jónindegi jumysty jandandyrýdy tapsyrdy. Úkimet basshysy ákimderge aǵash otyrǵyzý josparlarynyń oryndalýyn, kóshet materıalyn ósirý úshin tálimbaqtar men orman sharýashylyqtarynyń jaı-kúıin erekshe baqylaýǵa alýdy tapsyrdy.
Asqar Mamın ónerkásiptik kásiporyndardyń, JEO-nyń, avtokóliktiń atmosferaǵa shyǵaryndylaryna baqylaýdy kúsheıtý qajettigin atap ótti. Indýstrıa jáne ınfraqurylymdyq damý mınıstrligine avtokólikti tehnıkalyq baqylaý stansıalarynyń jaýapkershiligin kúsheıtý tapsyryldy.