Osy jylǵy qańtar-mamyrda respýblıka kásiporyndarynda jazataıym oqıǵalardyń saldarynan 564 adam zardap shekti.
Onyń 19,5%-y taý-ken metalýrgıa kesheni kásiporyndarynda, 4,5%-y komýnaldyq sharýashylyqta jáne 10%-y – qurylys salasynda.
QR Premer-Mınıstri Asqar Mamınniń tóraǵalyǵymen ótken Úkimet otyrysynda kásiporyndarda qaýipsiz eńbek jaǵdaılaryn qamtamasyz etý sharalary qaraldy, dep habarlady Almaty-akshamy.kz. QR Premer-Mınıstrdiń saıtyna silteme jasap.
Eńbek jáne halyqty áleýmettik qorǵaý mınıstri Serik Shápkenov, tótenshe jaǵdaılar mınıstri Iýrıı Ilın, Qostanaı oblysynyń ákimi Arhımed Muhambetov, Pavlodar oblysynyń ákimi Ábilqaıyr Sqaqov baıandama jasady. Bıyl jyl basynan beri óndiristik jaraqattaný deńgeıi 1 myń adamǵa 0,08 qurady (2020 jylǵy 5 aıda – 0,07).
Óndiristik jaraqattanýdyń joǵary deńgeıi Qaraǵandy, Shyǵys Qazaqstan jáne Aqtóbe oblystarynda saqtalýda. Bul kórsetkishtiń tómendeýiniń oń serpini Qostanaı jáne Pavlodar oblystarynda baıqalady. Otyrysta Qaýipsiz eńbekti qamtamasyz etý jónindegi 2025 jylǵa deıingi is-qımyl jospary bekitildi. Qujat táýekelge baǵdarlanǵan tásil negizinde eńbekti qorǵaýdy basqarýdyń ulttyq júıesin jańǵyrtýdy, jumys oryndarynda kásiptik táýekeldi azaıtý boıynsha jumys berýshilerdi ekonomıkalyq yntalandyrý jóninde usynystar ázirleýdi, eńbekti qorǵaý salasyndaǵy kásiptik biliktilik pen ǵylymı áleýetti, áleýmettik áriptestikti damytýdy kózdeıdi. Jospardy iske asyrý nátıjesinde óndiristik jaraqattaný 10%-ǵa, zıandy eńbek jaǵdaılarynda jumys isteıtin jumyskerler sany 20%-ǵa deıin tómendeıdi dep boljanǵan. «Óndiristik kásiporyndarda halyqaralyq «Vizion Zero» nóldik jaraqattaný tujyrymdamasyn belsendi engizý qajet. Árbir jaraqattaný jaǵdaıy Tótenshe jaǵdaılar mınıstrliginde muqıat taldanyp, qorytyndysy boıynsha olardy barynsha azaıtý úshin keshendi sharalar ázirlenýi tıis. Halyqaralyq standarttarǵa sáıkes keletin kásibı syn-tegeýrinderdi baǵalaý jáne basqarý júıesin engizý qajet», — dedi Asqar Mamın.
Premer-Mınıstr taý-ken metalýrgıa kesheni men qurylys salasy kásiporyndaryna erekshe nazar aýdara otyryp, óndiristik jaraqattanýdy azaıtý jónindegi jumysty jandandyrý qajet ekenin atap ótti. Úkimet basshysy osy jyldyń 1 jeltoqsanyna deıin jumys berýshiler úshin eńbek qaýipsizdigi talaptaryna sáıkestik boıynsha ózin-ózi baqylaýǵa onlaın-platforma ázirleýdi, sondaı-aq Úkimettiń qaraýyna eńbek jaǵdaılaryn jaqsartýda jumys berýshilerdi ekonomıkalyq yntalandyrýdy arttyrý turǵysynan zańnamany jetildirý boıynsha usynystar engizýdi tapsyrdy. Tótenshe jaǵdaılar mınıstrligine múddeli memlekettik organdarmen birlesip, osy jyldyń 1 qyrkúıegine deıin qaýipti óndiristik obektilerdegi apattylyqty azaıtý jónindegi jol kartasyn bekitý tapsyryldy. Óńirlerdiń ákimdikterine kásiporyndarmen birlesip, bıylǵy 1 qyrkúıekke deıin Qaýipsiz eńbek jaǵdaılaryn qamtamasyz etý jónindegi jol kartalaryn bekitý tapsyryldy.
Premer-Mınıstr sondaı-aq osy jyldyń sońyna deıin kásiporyndarmen óndiristegi jazataıym oqıǵalardan saqtandyrý sharttaryn jasasý boıynsha jumys júrgizýdi tapsyrdy.