Álıhan Smaıylov jylý maýsymyna daıyndyq jumysyna qatysty syn aıtty, dep habarlady Almaty-akshamy.kz QazAqparatqa silteme jasap.
«Qystyń qamyn jaz oıla» dep beker aıtylmaǵan. Biz osy máseleni maýsym aıynda ádeıi erterek qarap otyrmyz. Jylytý maýsymynyń bastalýyna deıin ýaqyt jetkilikti. Jóndeý jumystarynyń bekitilgen kestesi bar. Olardy buzýǵa bolmaıdy. Qazirdiń ózinde biz ákimdikter men ortalyq memlekettik organdardyń jumysynan birqatar kemshilikti kórip otyrmyz», - dedi Álıhan Smaıylov Úkimet otyrysynda.
Onyń aıtýynsha, keı óńirlerde jylý maýsymyna daıyndyq jumysy baıaý júrip jatyr.
«Birinshi basshylardyń, ákimder men mınıstrlerdiń jaýapty orynbasarlary kabınette otyrmaı jumystyń bel ortasynda júrýi tıis. Problemalardy obektiniń basynda shuǵyl sheshý qajet. Arqany keńge salatyn ýaqyt joq, jaz ortasy kelip qaldy. Táýlik boıy jumys isteý kerek, bizde qurylys maýsymy óte qysqa, sondyqtan táýekel de joǵary. Eger, jaz bitkenshe jaǵdaı jaqsarmaıtyn bolsa, onda jaýapty adamdarǵa qatysty kadrlyq sheshimder qabyldanady», - deıdi ol.