Túrkistan oblysynda 12 adam, onyń ishinde 9 bala qaza tapty. Bala quqyqtary jónindegi ýákil Dınara Zákıeva bolǵan jaǵdaıdyń egjeı-tegjeıin bólisti, - dep habarlaıdy aqshamnews.kz tilshisi.
Óńirlik ýákil Psıhologıalyq qoldaý ortalyǵynyń mamandarymen birge oqıǵa ornyna bardy.
"Úıde eki otbasy boldy - ata-analar men balalar. Órt shyǵyp, shatyr opyrylyp tústi", – dep jazdy Zákıeva Instagram-daǵy storısinde.
Oblystyq polısıa departamentinde "Órt qaýipsizdigi talaptaryn buzý" baby boıynsha qylmystyq is qozǵaldy.
Oqıǵanyń mán-jaıy
Túrkistan oblysy Tótenshe jaǵdaılar departamentiniń málimetinshe, 18 qarashada tańerteń Jetisaı aýdanyna qarasty Alǵabas aýylyndaǵy eki qabatty jeke turǵyn úıden órt shyqqany týraly habar túsken.
Oqıǵa ornyna jetken órtsóndirýshiler kelgen sátte úı tolyqtaı órtke oranǵany anyqtalǵan. Órtti sóndirý jáne barlaý kezinde úıden es-tússiz jatqan úsh adam evakýasıalanyp, jedel járdem brıgadasyna tapsyryldy.
"Úıdiń ishinen 12 adamnyń máıiti tabyldy, olardyń toǵyzy – bala", – delingen TJD habarlamasynda.
Kórshilerdiń aıtýynsha, oqıǵa bolǵan úıde qonaqtar bolǵan, sebebi aldyńǵy kúni úı ıelerinde is-shara ótken. Órt 360 sharshy metr aýmaqta tolyq sóndirildi.
Qazir oqıǵa ornynda barlyq jedel qyzmet jumys istep jatyr. Órttiń shyǵý sebebi anyqtalyp jatyr, tergeý bastaldy.
Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.