Qalta telefonyn joǵaltyp alǵan jaǵdaıda ne isteý kerek?
Qurylǵynyń qoldy bolǵanyna kóz jetkizgen soń uıaly baılanys operatorynyń qoldaý qyzmetine habarlasý qajet, dep habarlaıdy aqshamnews.kz
Mobıldi qurylǵynyń joǵalýy – sizdiń jeke málimetterińizdiń jarıa bolýyna ákeledi.
Fingramota.kz-tiń keńesine saı, birinshi áreket: SIM-kartany buǵattaý. Bul óte mańyzdy, sebebi alaıaqtar sizdiń SIM-kartańyzdy basqa adamdarǵa qońyraý shalý jáne SMS nemese messendjerler arqyly zıandy habarlamalar jiberý arqyly paıdalana alady.
Mysaly, alaıaqtar sizdiń telefon kitapshańyzdaǵy baılanys ıesine WhatsApp-qa «Fotodaǵy sen be?» nemese «Qarashy, mynaý qyzyq eken» degen mátini bar faıl jiberýi múmkin. Al ol faıldy ashqannan keıin paıdalanýshynyń qurylǵysyna vırýs júkteledi.
Nemese alaıaqtar yqtımal qurbandarǵa qońyraý shalyp, dıpfeıkti paıdalanyp, daýysyńyzdy salý arqyly shuǵyl túrde aqsha aýdarýdy suraýy múmkin.
Eger qońyraý nemese habarlamalar sizdiń telefonnan bolsa, oǵan qatysyńyz joq ekenin dáleldeý ońaı bolmaıdy. Sondyqtan qurylǵynyń joǵalýy anyqtalǵannan keıin uıaly baılanys operatorynyń qoldaý qyzmetine habarlasý óte mańyzdy.
Buǵattaýdan keıin SIM-karta qońyraýlar men basqa operasıalar úshin qoljetimdi bolmaıdy. Bógde adamdar sizdiń nómirińizdi paıdalana almaıdy, sonymen qatar alaıaqtyq úshin tólemderdi rastaı almaıdy.
WhatsApp-ty qalpyna keltirý úshin sol telefon nómiri bar jańa SIM-kartany iske qosyp, SMS-habarlamada nemese telefon arqyly alatyn alty tańbaly kodty engizý arqyly WhatsApp-qa qaıta tirkelý kerek.
WhatsApp-qa qaıta tirkelgennen keıin jańa smartfon joǵalǵan nemese urlanǵan qurylǵydaǵy WhatsApp eseptik jazbańyzdan avtomatty túrde shyǵady, sebebi bul messendjerdiń ereksheligi – ony bir ýaqytta tek bir telefon nómirine tirkeýge bolady.
Akkaýntqa kirýdi qalpyna keltirgennen keıin qurylǵyny qorǵaýdy eki faktorly aýtentıfıkasıa, kirý kody, saýsaq izi boıynsha buǵattaýdy ashý nemese telefon úlgisi úshin qoljetimdi basqa ádistermen ornatý usynylady.