Talapkerlerdiń beınejazbasyn qaıta tekserý barysynda ereje buzý faktileri anyqtaldy
Bıylǵy UBT bastalǵaly beri 139 bal jınaǵan eki talapker tirkeldi. Degenmen qaıta tekserý kezinde atalǵan oqýshylardyń ereje buzǵany belgili boldy, dep habarlaıdy Almaty-akshamy.kz.
Bul jaıynda Ulttyq testileý ortalyǵynyń dırektory Rýslan Emelbaev habardar etti.
«Sizder UBT-da óz bilimińizben joǵary upaı jınasańyzdar, biz qatty qýanamyz. Biraq akademıalyq adaldyq qaǵıdalaryn saqtamaı, ońaı tapsyrý joldaryna júginetin talapkerler bar. Sondyqtan sizderge qýanyshty jańalyqty aıtar aldynda qosymsha tekseris júrgizýdi jón kórdik. Ókinishke qaraı, talapkerlerdiń beınejazbasyn qaıta tekserý barysynda ereje buzý faktileri anyqtaldy. Tıisti sharalar qoldanyp, testilenýshilerdiń upaıyn joıdyq» - dep jazdy Rýslan Emelbaev Instagram paraqshasynda.
Onyń aıtýynsha, akademıalyq adaldyq bárinen joǵary turýy tıis.
«Ózińizdi de, ózgelerdi de aldaýdyń qajeti joq. Eń durysy armandaryńyzǵa adal jolmen jetińizder. UBT-da tereń biliminiń arqasynda 140 bal jınaıtyn test tapsyrýshy tabylady dep senemiz. Ol dál siz bolýyńyz múmkin, biz sizdi kútemiz. Meniń jeke nómirim ashyq jarıalanǵan, Sizder áleýmettik jelilerde jazyp jatqan ár habarlamany oqımyn. Osyǵan deıin jazǵanymdaı, dál qazir biz 100-den asa erekshe joǵary bal (20+ baldan 90+ balǵa deıin) jınaǵan talapkerlerdiń beınejazbasyn qosymsha tekseristen ótkizip jatyrmyz. Ereje buzýshylyqtyń arqasynda qol jetken búkil nátıje joıylady»,- dep atap ótti ortalyq dırektory.