Almaty jastaryna kásipker Eldos Aıbekov taım-menedjment qupıalarymen bólisti
Almaty qalasynyń Áýezov aýdanyndaǵy komúnıtı-ortalyqta «Jumysshy mamandyqtar jyly» aıasynda uıymdastyrylǵan erekshe semınar ótti. İs-sharanyń basty taqyryby – taım-menedjment, ıaǵnı ýaqytty tıimdi basqarý boldy. Bul týraly Aqshamnews.kz saıty habarlaıdy.
Semınardyń maqsaty – kolej stýdentteri men jas mamandarǵa kásibı ósýdiń negizgi quraly retinde ýaqytty durys paıdalanýdyń mańyzyn túsindirý. Leksıany tanymal kásipker, birneshe bıznes salasynda tájirıbesi bar Eldos Aıbekov ótkizdi.
«Úsh ret bankrot boldym – biraq alǵa umtylýdan jalyqpadym»
Eldos Aıbekov – tájirıbeli kásipker, ómir jolynda kóptegen qıyndyqtardy bastan keshirgen. Ol jas tyńdarmandarǵa shynaıy mysal keltirip, motıvasıa berdi:
«Men úsh ret bankrot boldym. Eń úlken qaryzym – 700 myń AQSH dollary. Biraq eshqashan toqtaǵan emespin. Sátsizdikter – bul sabaq. Eń bastysy – naqty josparlaý, al onyń negizinde taım-menedjment turady», – dedi spıker.
Kásipker jastarǵa naqty keńester berip, olardyń basty qatelikteriniń biri – isterdiń retin durys anyqtaı almaýy ekenin atap ótti.
Jańa kitap – jas kásipkerlerge arnalǵan qural
Aıta keterligi, Eldos Aıbekov «Jumysshy mamandyqtar jyly» aıasynda «Bıznes pen kásipkerliktiń negizderi» atty oqý-ádistemelik quralyn jaryqqa shyǵardy. Bul eńbek shaǵyn jáne orta bıznestiń (SHOB) atlasy negizinde daıyndalǵan.
«Kolej túlekteri jıi bızneske bet burady. Sol sebepti bul kitap olar úshin óte ózekti. Onyń ishinde ınteraktıvti oıyndar, prezentasıalar men beınesabaqtar bar, bul ustazdarǵa da kómektesedi», – deıdi avtor.
Jastardyń pikirinshe – motıvasıa men tártip mańyzdy
Semınarǵa qatysqan stýdentter koýchtyń dárisinen úlken áser alǵandaryn aıtty. Máselen, stýdent Eraly Bahbergen:
«Eızenhaýer matrısasy óte unady. Ol mańyzdy jáne shuǵyl isterdi bólýge kómektesedi. Men óz ýaqytymdy utymdy paıdalanýǵa tyrysamyn. Genrı Fordtyń “Ýaqyt bosqa ketýdi unatpaıdy” degen sózimen kelisemin», – dedi.
Áýezov aýdany jastary úshin – jyl boıy paıdaly is-sharalar
Komúnıtı-ortalyq jetekshisi, UAQYT qoǵamdyq qorynyń tóraǵasy Baýyrjan Mahambet semınardyń jastar tárbıesindegi mańyzyna toqtaldy:
«Kóp jastar ýaqytyn smartfonǵa jumsap, tek kóńil kóterýmen shektelip jatady. Al shyn máninde bul ýaqytty óz damýyna arnaýǵa bolady. Biz osy jyly Áýezov aýdanyndaǵy 14 pen 35 jas aralyǵyndaǵy 32 myńǵa jýyq jas úshin kóptegen is-shara uıymdastyramyz», – dedi ol.
Jumysshy mamandyqtar jyly – tek mamandyq tańdaýdyń emes, sonymen qatar ózin-ózi damytýdyń, eńbekke degen qurmet pen tártipke negizdelgen kózqarastyń qalyptasý kezeńi. Eldos Aıbekovtiń tájirıbesi men keńesteri almatylyq jastarǵa baǵyt-baǵdar berip, ýaqytty tıimdi basqarýdyń naqty joldaryn usyndy.