Búgin úgit jumystary aıaqtalady.
Bas prokýratýra 19 naýryzda ótetin Májilis jáne máslıhattar depýtattaryn saılaý aldyndaǵy tynyshtyq kúni talaptaryn eske saldy, dep habarlaıdy Almaty-akshamy.kz
"Búgin saǵat 24:00-de saılaý aldyndaǵy úgit jumystarynyń kezeńi aıaqtalady. Erteń, 18 naýryzda jáne daýys berý kúni – 19 naýryzda kez kelgen úgitti júrgizýge tyıym salynady. 14 naýryzdan BAQ-ta saýalnama nátıjelerin, saılaý nátıjeleriniń boljamdaryn, saılaýǵa, kandıdattardy qoldaýǵa daýys berýge baılanysty ózge zertteýlerdi jarıalaýǵa da jol berilmeıdi", - dedi Bas prokýrordyń orynbasary Jandos Ómirálıev Ortalyq saılaý komısıasynyń otyrysynda.
Sondaı-aq ol saýalnamaǵa qatysty birqatar talaptarǵa toqtaldy.
Mundaı saýalnamany daýys berýge arnalǵan úı-jaıda nemese pýnktte júrgizýge bolmaıdy ("Qazaqstan Respýblıkasyndaǵy saılaý týraly" Konstıtýsıalyq zańnyń 28-babynyń 9-tarmaǵy).
Olardy, tirkelgen jáne Ortalyq saılaý komısıasyn jazbasha túrde habardar etken zańdy tulǵalar ǵana saılaý ýchaskelerinen shyǵa beriste júrgize alady.
Atalǵan saýalnamalardyń nátıjelerin BAQ-da daýys berý kúninen keıin, ıaǵnı 2023 jylǵy 20 naýryz saǵat 00:00-den bastap jarıalaýǵa ruqsat etiledi.
"Konstıtýsıalyq zańnyń osy talaptaryn oryndamaý Ákimshilik quqyq buzýshylyq týraly kodekstiń 102 jáne 120-baptarynda kózdelgen jaýaptylyqqa ákep soǵady", - dedi Jandos Ámirálıev.
Atalǵan zań talaptary Parlament Májilisi depýtattarymen qatar, barlyq deńgeıdegi máslıhattar depýtattarynyń kezekten tys saılaýyna da qatysty.
Bas prokýrordyń orynbasary saılaý zańnamasynyń normalaryn saqtaýda erekshe ról saılaý komısıalarynyń múshelerine júkteletinin atap ótti.
"Saılaýdyń jarıalylyǵy men ashyqtyǵyna áser etetin qatysýshylardyń taǵy bir sanaty, olar – saıası partıalar, basqa da akredıtasıasy bar qoǵamdyq birlestikter, Qazaqstannyń komersıalyq emes uıymdarynyń baıqaýshylary jáne kandıdattardyń senimdi adamdary.Olardyń qyzmeti, quqyqtary men mindetteri Konstıtýsıalyq zańmen rettelgen. Bul zań baıqaýshylar men senimdi adamdarǵa quqyqtarmen qatar, birqatar mindetterdi júkteıdi. Olardyń saqtalmaýy tıisti quqyqtyq saldarǵa ákep soǵady", - dedi ol.