Almaty-akshamy.kz saıtynda búgin jaryq kórgen jańalyqtarǵa sholý – kún kerýeni
Týrızmniń kúni týa ma?
Sol úshin Qazaqstanda týrızm salasynyń derekterin taldaýǵa negizdelgen joba iske qosyldy. Halyqaralyq týrızm jáne meımandostyq ýnıversıtetiniń qyzmetkerleri sentımentaldy taldaý jáne statısıkalyq modeldeý (text analysis) ádisterin paıdalana otyryp týrızm salasynyń negizgi úsh bóligi – ornalastyrý oryndary (Hotels and Hostels), tamaq jáne sýsyndar (Food and Beverage), sonymen qatar kórikti jerler (Attractive places) boıynsha Qazaqstanda bolǵan týrıserdiń pikiri men sholýyna TripAdvisor platformasynda mátindik taldaý júrgizedi. Sondaı-aq Qazaqstandaǵy týrısik salanyń jaı-kúıi aıqyndalyp, týrızmdi damytý usynystary ázirlenedi.
Dronmen jaraqtanǵan polısıa
Saýd Arabıasynyń polısıa qyzmetkerlerine 2024 jyly Lucid Air kóligi beriledi. Kóliktiń artyqshylyǵy – mıgalkisinde. Onda ushqyshsyz barlaýshy drondar jasyrylǵan. Kvadrokopter sanaýly sekýndtarda ushyp ketý múmkindigine ıe. Ol úshin kóliktiń ishindegi túımeni bassańyz bolǵany. Dron qylmyskerlerdi nemese iz-tússiz joǵalǵan adamdy izdeý úshin aýmaqty tekserýge múmkindik beredi. Áýeden túsirilgen sýret onlaın rejıminde kóliktiń ishinde ornalasqan ekranda birden kórsetiledi.
Taýdaǵy qurylys erekshe baqylaýda
Almatyda betkeıdiń tiktigi 15 gradýstan asatyn ýchaskelerde shaǵyn qabatty kóppáterli ǵımarattar salýǵa tyıym salynady.
"Taý bókterleriniń odan ári damýyn shekteý úshin Bas jospar men jańa ETJ aıasynda bul aımaqtar rekreasıalyq aımaqtarǵa jatqyzyldy. Almatynyń aınalasynda topyraqtyń negizgi túri-sazdy. Topyraqtyń osy túri bar jerde qurylys júrgizý múmkin emes, sondyqtan qalada osy másele boıynsha belsendi sharýashylyq jumys júrgizilýde. Keıbir ýchaskelerde biryńǵaı káriz jelileri joq, sondyqtan biz osy máselelermen aınalysamyz", - dedi Erbolat Dosaev.
E-sommerce-tiń ekpini zor
Sońǵy 1-2 jyl bederinde elektrondy saýda 20, 2 %-ǵa artqan. Demek Qazaqstandaǵy elektrondy saýdanyń kólemi aldyńǵy jylǵa qaraǵanda 220,1 mlrd teńgege ulǵaıǵan degendi bildiredi. Otandastarymyz ınternet arqyly saýda jasaýǵa meılinshe bet burǵan. Bul rette, kıim-keshek, aıaq kıim jáne túrli aksesýarlardyń onlaın-satylymdaǵy úles salmaǵy basym bolǵany sonsha, bul tarapta 423,9 mlrd teńge jumsalǵan. Satylymdar kólemi boıynsha 2-orynǵa turmystyq tehnıka men elektronıka shyqqan jáne joǵary tehnologıalyq taýarlar 355 mlrd tengege satylyp, ósimi 11,6%-dy quraǵan.
Sýretshiniń «ǵalamy»
Jas ta bolsa ózindik qoltańbasy qalyptasyp úlgergen sýretshi Nurbolat Asqardyń kartınalarynda kúndelikti ómirdiń jan tebirenterlik sulýlyǵy, kún saıyn kezdesetin jańa emosıalar men alýan túrli mezetter beınelengen. Ábilhan Qasteev atyndaǵy QR Memlekettik óner mýzeıinde ashylǵan ĞALAM dep aıdar taǵylǵan jeke kórmesine barsańyz, sýretshi úshin otbasy degen – bul mahabbat, jeńis jáne adamdardyń rýhanı baılyǵy ekenin túsinesiz. Onyń «Oshaq», «Ana men bala», «Nemere», «Aq dastarhan», «Tórteý» «Áńgime», «Oıý», «Taltús» jáne basqa da jumystary otbasy qundylyqtaryn myń boıaýmen bederleıdi. Ondaǵy jumsaq túster jaılylyq pen jylýlyqty berip qana qoımaı, adamdardyń bir-birimen rýhanı baılanysyn, bir-birine degen yqylasyn ashyp kórsetedi.
Maska keldi qaıtadan...
Densaýlyq saqtaý mınıstrligi qoǵamdyq oryndarda medısınalyq maska taǵýǵa keńes beredi. COVID-19 juqtyrǵandardyń basym bóligi Almaty men Astanada. Sanıtarlyq-epıdemıologıalyq baqylaý komıtetiniń baspasóz qyzmeti jeltoqsannan qańtarǵa deıin syrqattaný sany 2,5 esege artqanyn habarlady. Qazir juqpaly ınfeksıa juqtyrǵan 3 naýqas aýrýhanada emdelip jatyr.
Almatynyń uıqysyn urlaǵandar
Jaýapkershilikke tartylady. Medeý aýdanynyń turǵyndarymen kezdesýinde Almaty ákimi Erbolat Dosaevtan turǵyndardyń tynyshtyǵyn buzatyn avtoshabandozdarǵa qatysty shara qabyldaý suraldy.
«Biz aýdan turǵyndarynyń shaǵymyn eskerdik. Túngi tynyshtyqty buzǵandarǵa jaýapkershilik bar. Polısıa departamenti ókilderimen birlesip, Dostyq dańǵyly, Kereı-Jánibek handar kóshesinde «Sergek» beınekameralaryn ornatýdy tapsyrdym. Onda jyldamdyq shekteýli. Beınebaqylaý kameralary bul jaǵdaıǵa oń áser etetinine senimdimin», - dedi Erbolat Dosaev.
Ysyrapqa jol joq
Úkimettiń aldyndaǵy negizgi mindetterdi belgilep bergen Oljas Bektenov ónimsiz shyǵystar tolyǵymen joıylýy kerektigin aıtty.
«Qarjy mınıstrligi 10 kún ishinde respýblıkalyq búdjetke jáne bir aı ishinde jergilikti búdjetterdiń barlyǵyna revızıa júrgizip, asa mańyzy joq shyǵystardy aıtarlyqtaı qysqartýy tıis. Eshkim de aqshany orynsyz shashpaýy kerek», dedi Premer-Mınıstr.
Júregińizdi satyńyzshy!
Elimizde 4 myńǵa jýyq adam aǵza aýystyrýǵa muqtaj, al donor máselesi tıisti deńgeıge jetpeı jatyr. Sý jańa mınıstr Aqmaral Álnazarova birinshi kezekte transplantologıa máselesine nazar aýdaratynyn aıtty.
«Máıittik donorlyq qarastyrylǵan Qazaqstanda. Zań qabyldaǵanda halyqaralyq tájirıbege súıenip jasalǵan júıe. Bul júıeni durys jolǵa qoıý úshin qaıta tarıfterdi kóterýimiz kerek. Birneshe satydan turatyn jumys bolady dep oılaımyn. Bul jerde halyqtyń kelisimin almaı, ol úshin halyq ta, qoǵam da oǵan daıyn bolýy kerek», - deıdi QR Densaýlyq saqtaý mınıstri.