Almatyda UN Tourism (BUU Týrızm) uıymynyń týrısik ındýstrıada áıelderdiń quqyǵy men múmkindigin keńeıtý máselesine arnalǵan alǵashqy óńirlik konferensıasy ótip jatyr. İs-sharany uıym Almaty Tourism Bureau-men birlesip uıymdastyrdy. Konferensıa Eýropa men Ortalyq Azıa elderiniń úkimet ókilderin, halyqaralyq uıymdardy, bıznes pen úkimettik emes sektordy biriktirdi.
Qazaqstan týrızm salasyndaǵy genderlik teńsizdikpen kúresýge baǵyttalǵan UN Tourism-niń Centre Stage atty flagmandyq bastamasyna belsendi qatysyp otyr. Bastamanyń negizgi maqsaty – áıelderdiń jetekshilik laýazymdarǵa, kásipkerlikke, tehnologıaǵa jáne bilimge qoljetimdiligin keńeıtý.
Konferensıa aıasynda ótken mınıstrlik deńgeıindegi dóńgelek ústelde genderlik teńdikti ilgeriletýdegi saıası erik-jigerdiń mańyzy talqylandy. Sondaı-aq, týrızm salasyndaǵy áıelder jıi kezigetin sıfrlyq teńsizdik pen áleýmettik stereotıpter taqyrybynda paneldik sesıalar ótti.
Centre Stage bastamasy aıasynda Qazaqstanda 200 áıel-mamandy oqytý, aqparattyq naýqan júrgizý jáne áıel-kásipkerlerdi qoldaýǵa arnalǵan arnaıy sharalar ázirleý josparlanǵan.
«Áıelder - Qazaqstanda jáne búkil óńirde turaqty týrızmniń bolashaǵyn qalyptastyratyn kúsh. Centre Stage baǵdarlamasy arqyly biz áıel-kásipkerler men kásibı mamandarǵa qajet daǵdy, qoldaý men senim uıalatyp, olardyń kóshbasshylyq áleýetin ashýǵa kómektesemiz», – dedi UN Tourism atqarýshy dırektory Zorısa Ýroshevıch.
Almaty qalasy Týrızm basqarmasynda bul konferensıanyń qala ındýstrıasy úshin paıdasy aıtyldy.
«Bul konferensıa jaı iri halyqaralyq is-shara emes. Bul Almatynyń týrızmdegi teń múmkindikter men turaqty damýǵa baǵyttalǵan jahandyq qozǵalysqa qosqan úlesi. Áıelderdiń kóshbasshylyǵyn, olardyń kásipkerlik áleýetin qoldaý – búkil salanyń ósýine strategıalyq resýrs. Konferensıanyń Almatyda ótýi týrızm ındýstrıasyna aıtarlyqtaı serpin beretinine senimdimiz», – dedi Almaty qalasy Týrızm basqarmasy basshysynyń orynbasary Aqmaral Eshanova.