Túrik mádenıeti jáne murasy qory men Qyzylorda oblysy ákimdiginiń birlesken uıymdastyrýymen Qazaqstan Respýblıkasynyń Qyzylorda oblysy, Qarmaqshy aýdanynda ornalasqan "Qorqyt ata" memorıaldyq kesheninde túrki halyqtarynyń fólklorlyq-mýzykalyq ónerine arnalǵan "Qorqyt jáne Uly Dalanyń áýenderi" atty VII Halyqaralyq festıvál ashyldy.
"Ádebıet jáne óner" portalyna Túrik mádenıeti jáne murasy qorynan berilgen málimetke sáıkes, festıválge Ázerbaıjan, Qazaqstan, Qyrǵyzstan, Túrkıa, Ózbekstan, Tyva jáne Altaıdan kelgen 200-ge jýyq óner sheberleri qatysýda. Bul festıvál Qyzylordanyń Qazaqstannyń astanasy (1925–1927 jyldary) bolyp jarıalanýynyń 100 jyldyǵyna arnalǵan.
Halyqaralyq sharanyń basty maqsaty — túrki halyqtarynyń baı mádenıetin, ulttyq mýzykasyn jáne rýhanı qundylyqtaryn nasıhattaý, sondaı-aq halyqaralyq mádenı baılanystardy nyǵaıtý.
Saltanatty ashylý rásiminde Túrik mádenıeti jáne murasy qorynyń prezıdenti Aqtoty Raıymqulova men Qyzylorda oblysynyń mádenıet, arhıv jáne qujattama basqarmasynyń basshysy Janmurat Seıilov quttyqtaý sóz sóılep, festıvál qatysýshylaryna shyǵarmashylyq tabys tiledi. Merekelik keshte túrki elderinen kelgen dástúrli mýzykalyq ónerdiń tanymal oryndaýshylary kórermenderdi erekshe óner kórsetilimderimen qýantty.
Kelesi kúni túrki elderiniń fólklorlyq-mýzykalyq ónerine arnalǵan "Qorqyt jáne Uly Dalanyń áýenderi" halyqaralyq festıvali aıasynda "Qorqyt murasy: Túrki dúnıesi úshin ortaq epıkalyq qundylyqtar" atty halyqaralyq ǵylymı-teorıalyq konferensıa ótti. Konferensıaǵa Túrik mádenıeti jáne murasy qorynyń prezıdenti Aqtoty Raıymqulova, Qyzylorda oblysynyń ákimi Nurlybek Nálibaev sondaı-aq túrki elderiniń mádenıet, tarıh jáne ádebıet salalaryndaǵy jetekshi ǵalymdary men sarapshylary qatysty.
İs-sharanyń basty maqsaty – Qorqyt murasynyń jáne onyń epıkalyq dástúrleriniń túrki halyqtarynyń rýhanı ári mádenı ómirindegi mańyzyn jan-jaqty talqylaý, ǵylymı zertteýlerdi damytý jáne halyqaralyq yntymaqtastyqty nyǵaıtý boldy. Konferensıa barysynda "Qorqyt ata kitabynyń" tarıhı negizderi, onyń túrki álemindegi róli, sondaı-aq zamanaýı mádenıet pen ádebıettegi kórinisi taqyryptarynda pikir almasýlar júrgizildi. Ǵalymdar ózderiniń jańa ǵylymı zertteý nátıjelerin usyndy jáne Qorqyt murasyn zertteýdegi qazirgi teorıalyq tásilderimen bólisti.
Túrik mádenıeti jáne murasy qorynyń prezıdenti Aqtoty Raıymqulova óz sózinde konferensıa qatysýshylaryn quttyqtap, Qorqyttyń uly murasyn saqtaý men ony álemdik deńgeıde tanytýdyń mańyzdylyǵyn atap ótti. Konferensıa aıasynda ǵylymı baıandamalar tyńdaldy, paneldik pikirtalastar ótti, sondaı-aq "Túrki fólklorlyq murasy" antologıasy jobasy aıasyndaǵy "Túrki qaharmandyq eposy" serıasynyń alǵashqy tomy tanystyryldy.
İs-shara sońynda Qazaqstannyń eńbek sińirgen óner qaıratkeri, T. Júrgenov atyndaǵy Qazaq ulttyq óner akademıasynyń dosenti Úljan Baıbosynova "Kóruǵly" poemasynan jáne Syr eliniń jyraýlaryna tán birneshe jyr úzindilerin oryndady.
Bul halyqaralyq konferensıa túrki dúnıesindegi epıkalyq shyǵarmashylyq dástúrlerdiń birligi men ózara baılanysyn nyǵaıtýǵa arnalǵan mańyzdy alań bolýmen qatar, túrki halyqtarynyń rýhanı murasyn saqtaý jáne nasıhattaý jolyndaǵy aıtýly qadam retinde baǵalandy.