Keshe Úkimet saǵaty İshki ister mınıstrliginde ótti. Depýtattar ishki ister mınıstri Erjan Sádenovke birneshe saýal joldady, - dep habarlaıdy aqshamnews.kz tilshisi.
"1,5 mln kameramyz bar, 58 paıyz qylmys ashyldy dep ottyrsyz. Qarapaıym suraq: nege joǵalǵan, urlanǵan smartfondar tabylmaıdy? Bir jarym jyl boldy, Esil aýdany polısıa bólimshesinde meniń aryzym jatyr. Jaraıdy, meni qoıshy, jalpy qarapaıym halyq smartfonyn joǵaltyp alady. Jaı ǵana telefonymyzdy taba almaı jatqanda, joǵary, jahan máselelerin aıtqan qyzyq kórinedi eken", - dedi Májilis depýtaty Samat Nurtaza.
Samat Nurtazanyń ókpe-nazyn áriptesteri de jalǵap ketti. Májilismen Baqytjan Bazarbek Aqtóbede jábirlenýshiden mıllıon teńge suraǵan polıseı men Shymkentte bodı-massaj stýdıasyn qanatynyń astyna alyp qorǵashtaǵan tártip saqshasyn mysalǵa keltirdi.
"Halyqtyń polıseılerge degen senimin arttyramyz dep, biz mynda shapqylap júrgende, óńirlerde túrli masqarany kórip jatyrmyz. Máselen, Jetisý oblysynda zattaı dálel bolǵan 24 mıllıon teńgeni tártip saqshysy qoldy qylǵan. Shymkent shaharynda polıseıler bodı-massaj jasaıtyn jyn-oınaq salondy ózderi bılep-tóstep, eshkim tımeıtindeı qorǵashtap júripti", - dedi Májilis depýtaty Baqytjan Bazarbek.
"Úzeńgilesteriniń atyna kir keltirip, tutas qazaq polısıasyn jaman atty qylatyndarmen áńgime qysqa degen sózin" búgin mınıstr Sádenov taǵy qaıtalady. Aılyq ta 30 paıyzǵa ósti, sondyqtan artyq qyltyń-syltyńdy qoıyp, polıseıdiń bar nazary jumysta bolýy kerek.
Erjan Sádenov áriptesterine pogondaǵy juldyz sany ósken saıyn, qyzmettegi jalaqysy da, laýazymy da joǵarylaıdy dedi. Tek barlyǵyna shydam kerek. Al laýazymyn asyra siltep paıdalanyp, "polıseı" degen atty kirletkender jumystan qýylady, qala berdi jasaǵan tirligine ókinetin bolady dedi jaýapty sheneýnik.