Almatylyq qutqarýshylar Túrkıadaǵy jer silkinisinen zardap shekkenderge jylyný pýnktterin uıymdastyryp, jer silkinisinen zardap shekken 300-den astam adamǵa kómek kórsetti.
QR Tótenshe jaǵdaılar mınıstrligi respýblıkalyq jedel-qutqarý jasaǵynyń basshysy Vladımır Soı men onyń áriptesteri qalaı kómek kórsetkenderin aıtyp berdi.
«Bizdiń dárigerler alǵashqy medısınalyq kómek kórsetti. Elestetip kórińizshi, adamdar táýlik boıy sýyqta júr, ottyń janynda kishkentaı balalar boldy. Men olarǵa syrtynan qarap turdym, olar sondaı tózimdilik pen batyldyq tanytty», - dedi Vladımır Soı.
Ol 6 jasar ulyn denesimen jaýyp, qutqarmaq bolǵan er adamnyń oqıǵasyn aıtyp berdi. Bala aman qalýy múmkin edi, biraq onyń joly bolmady, shkaftyń buryshy balanyń basyn tesip ketken. Búkil otbasyn shyǵarýǵa týra keldi.
«Maǵan bir áıel kelip, telefonynan 2,5 jasar qyzdyń sýretin kórsetti. Qyzyn taýyp berýimizdi ótindi. Onyń aıanyshty kúıine qaraý óte qıyn boldy. Biz qyzdy taptyq, biraq odan artyq eshqandaı kómek kórsete almadyq...», - deıdi qutqarýshy.
Vladımır Soı túrikterdiń jandaryna jaqyn kelip, qutqarýshylarǵa jáne el Prezıdentine alǵystaryn bildirgenin aıtty.
Qutqarý bólimshesiniń basshysy Baýyrjan Arystanbaev dúmpýlerdiń jumysqa kedergi bolǵanyn aıtyp, estelikterimen bólisti. Qutqarýshylar jumys istep jatqan jerlerde kez kelgen sátte qulap ketýi múmkin tolyq qıramaǵan úılerdiń synyqtary ilinip turǵan.
«Eń qıyny tutastaı otbasylardy qırandylardan shyǵarý boldy. Aman qalǵandardyń joly boldy, olar ashyq qalǵan jerlerden shyǵaryldy, biraq ondaı jerler óte az boldy. Eń qaýipsiz oryndar ǵımarattardyń tirekterinde boldy», - dedi Baýyrjan Arystanbaev.
Sonymen qatar, avtoturaqtar aman qalǵan, biraq adamdar ol jerlerge jetip úlgermegen.
Almatydan Túrkıaǵa qyzmettik ıtteri bar úsh top jiberildi. Olardyń qatarynda kınologıalyq bólimniń bas qutqarýshy mamany Erik Berlybekov pen onyń ovcharka ıti Djeıkob boldy. Kınolog pen qyzmettik ıtke ártúrli jaǵdaıda jumys isteýge týra keldi, jerde armatýra men symdar shyǵyp turdy, alǵan jaraqattaryna qaramastan, ıt te izdeýdi toqtatpady. Djeıkobqa ózin maqtap, ári súıikti dobymen oınatyp qoısa bolǵany.
«It 20 mınýt jumys istep, 10 mınýt demaldy. Olar ýchaskeni sektorlarǵa bóldi. Birde barlyq ıister, onyń ishinde azyq-túlik, turmystyq hımıanyń ıisi de aralasyp ketken aýmaqqa tap boldyq. Biz tazalap júrip, ıtti kirgizdik. Ol sheńber jasap, tapqan ornyn óziniń úrýimen bildirdi. Qutqarylǵandardy osylaı taptyq», - dep tolyqtyrdy Erik Berlybekov.
Jedel qutqarý jasaǵynyń jas qutqarýshysy Serǵazy Ábdiqadyr alǵash ret shetelge issaparǵa shyǵypty. Túrkıada ol qutqarý jumystarynyń vıdeosyn túsirip, ony óziniń jeke paraqshasynda jarıalaǵan. Osy arqyly ol jigitterdiń jumysyn kórsetkisi kelgen, biraq onyń sýretteri tanymal bolady dep oılamapty. Ol ózin batyr sanamaıdy, biraq adamdardy qutqarýdy ortaq eńbek dep biledi.