Ábilhan Qasteev atyndaǵy Memlekettik óner mýzeıinde uıymdastyrylǵan kórmede Qazaqstan, Qyrǵyzstan, Ózbekstan, Reseı qylqalam sheberleriniń 80-nen astam týyndylary usynyldy, dep habarlaıdy aqshamnews.kz
Halyqaralyq sımpozıým-pleneri jumysy 2024 jyly bastaldy. Joba úsh kezeńnen turady. Úsh túrli geografıalyq alańda ótkizilip, birneshe aıǵa sozyldy. Birinshi kezeńde sýretshiler Ystyqkóldiń tynysh, sulý tabıǵatymen shabyttanyp, qyrǵyz jeriniń kórkem peızajdaryn beıneledi. Ekinshi kezeńi Qazaqstannyń Tán-SHan taýynda ornalasqan Kegen aýdanyna qarasty Merki jaılaýynda ótti. Qorytyndy kezeń Ózbekstannyń mádenı jáne sáýlet muralary sanalatyn Orta Azıanyń tarıhı qalalary – Samarqand, Buhara jáne Tashkentte ótti. Bul úsh qala da ortalyq Azıanyń rýhanı tiregine aınalǵan, ǵasyrlar boıy óner men mádenıettiń oshaǵy bolǵan mekender.
Sımpozıým-plener Ábilhan Qasteev pen Oral Tańsyqbaevtyń ónerdegi dástúrlerin jańǵyrtyp, olardyń shyǵarmashylyǵynan alǵan áser men rýhanı muraǵa qurmetpen qosa, qylqalam sheberlerine shabyt syılap, qoldaý kórsetý maqsatynda uıymdastyryldy.
Ekspozısıa qańtar aıynyń 23-ne deıin jalǵasady.