Prezıdent Qasym-Jomart Toqaev qazaqstandyqtardy Abaı Qunanbaıulynyń 180 jyldyq mereıtoıymen quttyqtady, dep habarlaıdy Aqshamnews.kz Aqordaǵa silteme jasap.
"Abaı – tól mádenıetimizdi damytýǵa ólsheýsiz úles qosqan álemdik deńgeıdegi kemeńger tulǵa, halqymyzdyń sana-sezimin jańǵyrtqan uly aqyn. Ol jańa ádebıetimizdiń negizin qalap, dúnıetanymymyzdyń kókjıegin keńeıtti. Óskeleń urpaqty bilimpaz, eńbekqor, adal azamat bolýǵa shaqyryp, ulttyń jańa sapasyn qalyptastyratyn qasıetterdi keńinen dáriptedi. Otanǵa degen súıispenshiliktiń jáne el múddesi úshin qaltqysyz qyzmet etýdiń ozyq úlgisin kórsetti" dedi Qasym-Jomart Toqaev.
Sondaı-aq ol Hákim Abaıdyń mol murasy – qazaq halqynyń ǵana emes, barsha adamzattyń ónege alatyn asyl qazynasy ekenin atap ótti.
"Onyń oı-tolǵamdary men ósıetteriniń ózektiligi eshqashan joǵalmaıdy. Sondyqtan Abaıdy taný jáne tanytý, shyǵarmashylyǵyn tereń zerdeleý óte mańyzdy. Búgingi saltanatty is-sharanyń túpki máni de – osynda" dedi Prezıdent.
Ol Shyǵys óńirin Abaımen qatar Shákárim Qudaıberdiuly, Muhtar Áýezov syndy ulttyń uly perzentterin dúnıege ákelgen kıeli ólke ekenin eske saldy. Memleket osy aımaqty ulttyq qundylyqtar mekeni retinde órkendetýge basa mán beretinin de qosa ketti.
"Uly oıshyldyń ómirsheń óleńderi men qasterli qara sózderi áli talaı urpaqqa rýhanı azyq bolary anyq" dep aıaqtady sózin memleket basshysy.