10 tamyzda qazaqstandyqtar Abaı kúnin atap ótedi. Bıyl uly aqyn, aǵartýshy, fılosof jáne kompozıtor Abaı Qunanbaıulynyń týǵanyna 180 jyl tolyp otyr, dep habarlaıdy Aqshamnews.kz.
Abaı 1845 jyly Semeı oblysynda (qazirgi Abaı oblysy) dúnıege kelgen. Onyń shyǵarmashylyǵy men tulǵasy búginge deıin ulttyq sana-sezimniń sımvoly bolyp keledi. Uly aqyn shyǵys pen batys mádenıetin sheber ushtastyra bildi. Pýshkın, Lermontov, Baıron, Gete syndy klasıkterdiń týyndylaryn qazaq tiline aýdaryp, halqyna usyndy.
Mereke tarıhy
Abaı kúnin atap ótý merekesi 2020 jyly, aqynnyń 175 jyldyq mereıtoıynda resmı túrde bekitildi. 5 tamyzda bul data Qazaqstannyń resmı merekeler tizimine engizildi. Alaıda mereke demalys kúni bolyp sanalmaıdy.
El boıynsha merekelik sharalar
Mereıtoıǵa oraı elimizde birqatar saltanatty is-sharalar ótedi. Merekelik baǵdarlama uly aqynnyń eskertkishterine gúl qoıý rásiminen bastalady. Almatyda jyl sońyna deıin 120-dan astam is-shara josparlanǵan. 10 tamyz kúni saǵat 09:00-den 11:00-ge deıin Abaı jáne Dostyq dańǵyldarynda kólik qozǵalysy ýaqytsha shekteledi.
"19 myńǵa jýyq Abaı bar"
Ulttyq statısıka búrosynyń dereginshe, búginde Qazaqstanda 18 763 adam Abaı esimin ıelengen. Eń kóp Abaı esimdi azamat Astanada (2 089), Túrkistan oblysynda (2 018) jáne Almatyda (1 719) turady. Bul esimdi ıelengen eń jasy úlken adam 1932 jyly týǵan. Eń tanymal jas aralyǵy – 30-34 jas, bul topta 3 228 Abaı tirkelgen.
Prezıdent Toqaev Abaı jaıly
Prezıdent Qasym-Jomart Toqaev Abaıdyń el damýyna qosqan úlesin erekshe atap ótti:
"Uly aqyn ultty birigýge, ádiletti qoǵam qurýǵa shaqyrdy. Biz usynyp otyrǵan "Tyńdaıtyn memleket» tujyrymdamasy – onyń ıdeıalarynyń jalǵasy. Memleket pen halyqtyń birlesip máselelerdi talqylaýy – órkenıetti qoǵamnyń belgisi. Mundaı pikir almasý úkimetke degen senimdi arttyryp, turaqtylyqty nyǵaıtady. Bılik pen halyqty biriktiretin bul ıdeıanyń bastaýynda Abaı tur dep aıtýǵa bolady", – dedi Memleket basshysy.
Abaı Qunanbaıuly – qazaqtyń uly aqyny, kompozıtory, aǵartýshysy, oıshyly, qoǵam qaıratkeri. Ol qazaq jazba ádebıetiniń negizin qalaýshy, alǵashqy klassıgi, ári mádenıetti Eýropaǵa jaqyndatqan reformator boldy.