Memleket basshysy Reseı Federaldy Jınalysy Federasıa keńesiniń tóraǵasy Valentına Matvıenkomen kezdesti, - dep habarlaıdy aqshamnews.kz tilshisi.
Valentına Matvıenkomen kezdesý barysynda Prezıdent bul saparyn Qazaqstan-Reseı san qyrly yqpaldastyǵynyń aıtýly kezeńi retinde qarastyratynyn aıtty.
"Bul sapar elderimiz arasyndaǵy strategıalyq seriktestik pen odaqtastyq qatynastardy jańa deńgeıge kóterý turǵysynan tarıhı mańyzǵa ıe", – dedi Memleket basshysy.
Qasym-Jomart Toqaev Vladımır Pýtınmen kezdesýi jaıynda aıtyp, eki eldiń resmı delegasıa ókilderiniń qatysýymen ótetin kelissózderdiń kún tártibine nazar aýdardy.
"Keshe Vladımır Vladımırovıchpen eki saǵatqa jýyq júzbe-júz otyryp áńgimelesip, kóptegen máseleni, ózara yntymaqtastyqty jáne halyqaralyq ahýaldy talqyladyq, – dedi Qazaqstan Prezıdenti.
Valentına Matvıenko kezdesý úshin Memleket basshysyna rızashylyǵyn bildirip, Qazaqstan Prezıdentiniń memlekettik saparyna Reseıdiń erekshe mán berip otyrǵanyn jetkizdi.
"Sizdiń saparyńyzǵa óte úlken daıyndyq júrgizilgenin bilemin. Mazmundy baǵdarlama men memleketaralyq qujattar paketi ázirlendi. Búgin bul qujattarǵa memleketter basshylary qol qoıady. Asa qurmetti Qasym-Jomart Kemeluly, Sizdiń "Rossııskaıa gazeta" basylymyna jarıalanǵan maqalańyzdy muqıat oqyp shyqtym. Shynymdy aıtsam, Reseı-Qazaqstan qarym-qatynasyna qatysty tustaryna alyp-qosarym joq. Eki el arasyndaǵy yntymaqtastyqtyń tarıhy, búgini jáne bolashaǵy jaıynda óte tereń tolǵam jasaǵansyz", – dedi Reseı Federaldy Jınalysy Federasıa Keńesiniń tóraǵasy.
Qasym-Jomart Toqaev pen Valentına Matvıenko saýda-ekonomıkalyq jáne mádenı-gýmanıtarlyq yntymaqtastyqtyń, sondaı-aq parlamentaralyq dıalogtyń ózekti máselelerin talqylady.
Joǵary deńgeıde qol jetkizilgen barlyq kelisimge zańnama turǵysynan sapaly qoldaý kórsetýdiń jáne Qazaqstan men Reseı parlamentteriniń kúsh-jigerin úılestirýdiń mańyzyn atap ótti.