Qasym-Jomart Toqaev pen Antonıý Gýterrısh Almaty qalasyndaǵy BUU óńirlik ortalyǵynda sóz sóıledi, - dep habarlaıdy aqshamnews.kz.
Qasym-Jomart Toqaev eń áýeli osy aıtýly is-sharaǵa qatysqany úshin BUU Bas hatshysy Antonıý Gýterrıshke rızashylyǵyn bildirdi.
Prezıdent búgingi is-sharanyń Qazaqstan ǵana emes, Birikken Ulttar Uıymy úshin de eleýli sıpatqa ıe ekenin atap ótti. Bul oqıǵa dúnıejúzilik kartada óte salmaqty aktorǵa aınalyp kele jatqan Ortalyq Azıanyń mańyzy jóninde halyqaralyq qoǵamdastyqqa aıqyn belgi bergenin jetkizdi.
Memleket basshysynyń aıtýynsha, qol qoıylǵan kelisim arqyly Ortalyq Azıa men Aýǵanstan úshin ornyqty damý maqsattary jónindegi óńirlik ortalyqtyń qurylýy resmı túrde bekitildi. Bul – Qazaqstan men BUU arasyndaǵy uzaq merzimdi jáne jemisti yntymaqtastyqtyń mańyzdy kezeńi.
"Geosaıası dúrbeleńder men qaqtyǵystar beleń alyp, klımattyq ózgerister kúrdelengen jáne azyq-túlik qaýipsizdigine qater tóngen shaqta Birikken Ulttar Uıymy álemdegi qaýipsizdik pen turaqtylyqty saqtaýda basty ról atqarýǵa tıis. Qazaqstan úshin BUU halyqaralyq tártiptiń balamasyz ári basty tiregi bolyp qala beredi. Elimiz Uıymǵa kirgen sátten bastap, 33 jyl boıy halyqaralyq qoǵamdastyqtyń jaýapty, belsendi ári beıbitsúıgish múshesi ekenin jan-jaqty tanytyp keledi", – dedi Prezıdent.
Qasym-Jomart Toqaevtyń pikirinshe, Almaty qalasynda BUU óńirlik ortalyǵynyń ashylýy aımaqtyń strategıalyq mańyzy artyp kele jatqanyn kórsetedi.
"Búginde Ortalyq Azıa birligi bekem jáne tatý kórshilik pen ortaq progres qaǵıdattaryna beıil óńir ekenin etip keledi. Aımaq elderi saıası jáne áleýmettik reformalar júrgizip, ekonomıkany ártaraptandyrý boıynsha batyl sharalar qabyldap jatyr. Adam kapıtalyn damytýǵa kúsh salyp, anaǵurlym ınklúzıvti ınstıtýttar qurýdy qolǵa aldy. Biz halyqaralyq ózekti máselelerdi sheshýge belsendi aralasatyn mámileger retinde Ortalyq Azıanyń áleýetin ashýǵa jáne jahandyq arenada konstrýktıvti ári keleshekti kózdegen kún tártibin dáıekti túrde ilgeriletýge umtylamyz. Osy oraıda Almaty qalasynda BUU óńirlik ortalyǵyn ashý ýaqtyly jáne strategıalyq turǵydan mańyzdy qadam bolyp otyr", – dedi Memleket basshysy.
Prezıdent Ortalyqtyń aımaqtaǵy elder ekonomıkasynyń ornyqtylyǵy men qarqynyn kúsheıtýge, óńirlik ınovasıany damytýǵa jáne yntymaqtastyqty tereńdetýge baǵyttalǵan úılesimdi is-qımyldar katalızatory bolady dep paıymdaıdy.
"Bul Ortalyqtyń quzyreti men fýnksıalary aımaqtaǵy nemese odan tysqary jerlerdegi basqa uıymdardyń qyzmetin qaıtalamaıdy. Kerisinshe, Ortalyq aımaq halqynyń naqty suranysyna nazar aýdarýdyń arqasynda qabyldanyp jatqan sharalardy tolyqtyryp, onyń mán-mazmunyn arttyra túsedi. Aral teńizindegi ekologıalyq daǵdarys pen Kaspıı teńiziniń tartylýy sıaqty Ortalyq Azıa problemalary barshaǵa belgili. Bul túıtkilderdiń tıimdi sheshimin tabý úshin óńirlik yqpaldastyqty nyǵaıtyp, oǵan Birikken Ulttar Uıymyn belsendi túrde tartý qajet. Osy rette Qazaqstan kelesi jyldyń sáýir aıynda Astanada BUU agenttikterimen birge Óńirlik ekologıalyq samıt ótkizedi", – dedi Memleket basshysy.