Memleket basshysy Qasym-Jomart Toqaev Qazaqstan jáne Italıa arasyndaǵy dostyq pen yntymaqtastyqty nyǵaıtýǵa aıryqsha úles qosqany úshin Prezıdent Serdjo Mattarellaǵa İ dárejeli «Dostyq» ordenin saltanatty túrde tabystady.
Sondaı-aq bul qazaq eliniń shynaıy qurmeti, barsha Italıa halqyna degen dostyq peıili men ystyq yqylasynyń aıǵaǵy ekenin jetkizdi.Memleket basshysy Italıa Prezıdentine halyqtyń qoldaýyna ıe bolǵan kóshbasshy, álemge tanymal bedeldi saıasatker dep baǵa berdi.
– Siz elińizdiń ósip-órkendeýine zor eńbek sińirip kelesiz. Búginde Italıa barlyq salada tolaıym tabysqa jetti. Álemdik kóshbasshylar qataryna kiretin memlekettiń biri. Elińizde ekonomıka, ınovasıalyq tehnologıa salasynda tyń jobalar júzege asyrylyp jatyr. Ekologıa, «jasyl» energetıka baǵytynda ozyq bastamalaryńyz bar. Italıanyń tereń tarıhy, biregeı mádenı murasy – búkil adamzattyń qundy qazynasy. Sizder aımaqtyq jáne jahandyq qaýipsizdikti saqtaý isinde mańyzdy ról atqaryp jatsyzdar. Halyqaralyq máselelerdi sheshýge belsene atsalysyp kelesizder. Bul – Sizdiń salıqaly saıasatyńyzdyń jemisi. Ózińizdiń basshylyǵyńyzben Italıa aldaǵy ýaqytta da bıik belesterdi baǵyndyra beredi dep senemin, – dedi Prezıdent.
Budan bólek, Qasym-Jomart Toqaev Serdjo Mattarellanyń eki el qarym-qatynasyn damytýǵa ólsheýsiz úles qosyp kele jatqanyna nazar aýdardy.– Saıası dıalogymyz joǵary deńgeıde júrip jatyr. Saýda-ekonomıkalyq jáne mádenı-gýmanıtarlyq baılanys qarqyndy damyp keledi. Kópjaqty qurylymdar aıasynda tyǵyz yqpaldastyq ornattyq. Men Sizdiń bul baǵyttaǵy eńbegińizdi erekshe baǵalaımyn. Birlesken kúsh-jigerimizdiń arqasynda qos halyqtyń dostyǵy nyǵaıa beredi. Búgingi kelissózder men ýaǵdalastyqtar strategıalyq seriktestigimizdi kúsheıte túsedi dep oılaımyn. Biz osy jolda birlesip áreket etýge daıynbyz, – dedi Prezıdent.