Memleket basshysy bokstan Álem chempıonatynyń jeńimpazdary men júldegerlerin marapattaý rásimine qatysty.
Prezıdent Qazaqstan ulttyq quramasynyń múshelerin Álem chempıonatyndaǵy tamasha jeńisimen quttyqtap, bul elimiz úshin tarıhı oqıǵa, halqymyz úshin úlken qýanysh ekenin atap ótti.
– Qazaqstan 68 memlekettiń arasynan úzdik shyǵyp, birinshi orynǵa ıe boldy. Álemdik básekede Ánuranymyz jeti ret shyrqaldy, Kók týymyz jeti ret jelbiredi. Barsha jurtymyz sizderge tileýles boldy. Árıne, kileń myqtylar jınalǵan jahandyq alamanda top jarý ońaı emes. Bul jetistik jyldar boıǵy tabandy eńbekpen, mańdaı termen kelgeni anyq. Bizdiń ul-qyzdarymyz bokstyń otanyna baryp, ózderiniń naǵyz myqty sportshy ekenin dáleldedi. Sanjar Táshkenbaı jáne Mahmud Sabyrhan álemniń eki dúrkin chempıony atandy. Tórehan Sabyrhan men Aıbek Oralbaıdyń erekshe ónerine jahan jurty tánti boldy. Boksshy qyzdarymyz álemdik jarysta sheberliktiń ozyq úlgisin kórsetti. Alýa Balqybekova, Aıda Ábikeeva jáne Natalá Bogdanova altyn medal alyp, jeńis tuǵyryna kóterildi. Nazym Qyzaıbaı sharshy alańǵa birinshi bolyp shyǵyp, elimizge aqjoltaı júlde ákeldi. Vıktorıa Grafeeva jáne Eldana Tálipova qola medal jeńip aldy. Men barshańyzǵa shynaıy rızashylyǵymdy bildiremin. Qaırat Sátjanov, Eldos Saıdalın bastaǵan bapkerlerge jáne basqa da mamandarǵa zor alǵys aıtamyn, – dedi Qasym-Jomart Toqaev.
Memleket basshysy Týrızm jáne sport mınıstrligi men Ulttyq Olımpıada komıteti kóp jumys atqarǵanyna toqtalyp, Qazaqstan Boks federasıasynyń eńbegin erekshe atap ótti.
– Biz úshin jekpe-jek sportynyń orny qashanda bólek. Sonyń ishinde áıgili Shoqyr Bóltekuly negizin qalaǵan qazaq boksynyń óz tarıhy bar. Ótken ǵasyrdyń ortasynan beri kóptegen sportshymyz álemdi moıyndatty. Táýelsizdik kezeńinde aǵa býynnyń dańqty joly úzilgen joq. Jazǵy olımpıada oıyndarynan el qorjynyna túsken 15 altynnyń jeteýi – boksshylarǵa tıesili. Bul sabaqtastyq bolashaqta laıyqty jalǵasyn tabady dep senemiz. Oǵan barlyq múmkindik bar, – dedi Prezıdent.