Memleket basshysy Qazaqstan halqyn Naýryz merekesimen quttyqtady, dep habarlaıdy Almaty-akshamy.kz Aqordanyń resmı saıtyna silteme jasap.
Almaty qalasyna jumys saparymen kelgen Prezıdent «Astana» alańynda ótip jatqan merekelik sharaǵa arnaıy bardy.
Qasym-Jomart Toqaev Qazaqstan halqyn Ulystyń Uly kúnimen quttyqtap, Naýryzdyń ejelden jaqsylyq pen jasampazdyqty dáripteıtin mereke ekenin atap ótti.
Áz Naýryz – bereke-birliktiń, shynaıy janashyrlyqtyń jáne ózara qamqorlyqtyń meıramy. Men búgin Ulys kúnin ózderińizben birge qarsy alý úshin Almaty qalasyna arnaıy keldim. Almaty – Táýelsizdigimizdiń altyn besigi. Halqymyzǵa qaıta oralǵan Ulys toıyn merekeleý osy qasterli mekennen bastalǵan. Almaty – Qazaq eliniń rýhanı, mádenı jáne iskerlik ortalyǵy, – dedi Memleket basshysy.
Prezıdent zıaly qaýymnyń jáne óner, bilim, ǵylym, bıznes salalary ókilderiniń Almaty shaharynda shoǵyrlanǵanyna toqtalyp, qańtar oqıǵasy kezinde qala turǵyndarynyń zor qaýip-qaterge tótep bergenine erekshe mán berdi.
Syn saǵatta turǵyndar naǵyz otanshyldyqtyń úlgisin kórsetti. Biz aýyzbirshiliktiń arqasynda memleketimizdi saqtap qaldyq. Men shahardy qalpyna keltirý úshin quzyrly organdarǵa naqty tapsyrmalar berdim. Almatyny órkendetý jáne jergilikti jurttyń turmys sapasyn jaqsartý meniń aıyryqsha nazarymda. Qazir bizdiń aldymyzda zor mindetter men aýqymdy jumystar tur. Ony júzege asyrýǵa almatylyqtar barynsha atsalysady dep senemin, – dedi Qasym-Jomart Toqaev.
Memleket basshysy damýdyń jańa kezeńine qadam basqanymyzǵa toqtalyp, óziniń halyqqa Joldaýynda aıtylǵan kólemdi reformalar elimizdi túbegeıli jańǵyrtýǵa baǵyttalǵanyn atap ótti.
Prezıdent búgingi merekelik kúnniń jańa ózgeristerge bastaýyna, tuǵyry myǵym, birligi bekem elimizdiń jasaı berýine tilektestik bildirdi. Qasym-Jomart Toqaev quttyqtaý sózinen keıin jınalǵan jurtshylyqpen birge merekelik konsertti tamashalady.