Toqaev Alataý qalasyna arnaýly mártebe berý týraly Jarlyqqa qol qoıdy

Prezıdent Qasym-Jomart Toqaev Alataý qalasyna arnaýly mártebe berý týraly Jarlyqqa qol qoıdy, - dep habarlaıdy Aqshamnews.kz tilshisi. 

Qazaqstan Respýblıkasynyń ınovasıaǵa baǵdarlanǵan ekonomıkasynyń ornyqty ósýin yntalandyrý, joǵary tehnologıalyq salalarǵa ınvestısıalar tartý jáne Almaty aglomerasıasynyń jınaqtalǵan áleýeti negizinde óńirde halyqaralyq mańyzy bar iskerlik jáne ınovasıalyq belsendilik ortalyǵyn qalyptastyrý maqsatynda QAÝLY ETEMİN:

         1. Alataý qalasyna damý qarqyny ozyq qala degen arnaýly mártebe (budan ári – arnaýly mártebe) berilsin.

         2. Mynalar:

1) kásipkerliktiń ósip kele jatqan jáne jańa salalaryna ınvestısıalar tartý jáne ártúrli qyzmet salalaryna ınovasıalar endirý esebinen Alataý qalasynyń áleýmettik-ekonomıkalyq damýyn jedeldetýdi qamtamasyz etetin erekshe ınstıtýsıonaldyq orta qalyptastyrý;

2) Alataý qalasyn damytýǵa kez kelgen jekeshe ınvestısıalardy tartý jáne qorǵaý úshin sapalyq jańa deńgeıdegi ınstıtýsıonaldyq bazany qamtamasyz etý;

3) Alataý qalasyn basqarýda, onyń ishinde arnaıy ekonomıkalyq aımaqtyń jumys isteýi jaǵdaılarynda jetekshi halyqaralyq tásilder men praktıkalardy qoldaný arnaýly mártebeniń negizgi baǵyty men mazmuny bolyp aıqyndalsyn.

3. Osy Jarlyqqa qosymshaǵa sáıkes quramda Alataý qalasyn damytý jónindegi keńes (budan ári – Keńes) qurylsyn.

4. Mynalar:

1) Alataý qalasynyń ınvestısıalardy tartý, iskerlik belsendilik pen ınovasıalardy damytý máseleleri jónindegi qujattardy, sondaı-aq onyń arnaýly mártebesine baılanysty ózge de qujattardy kelisý jáne bekitý; 

2) Alataý qalasynyń ınvestısıalardy tartý, iskerlik belsendilik pen ınovasıalardy damytý máseleleri boıynsha, sondaı-aq onyń arnaýly mártebesine baılanysty ózge de máseleler boıynsha ortalyq jáne jergilikti memlekettik organdardyń oryndaýy úshin mindetti sheshimder qabyldaý;

3) osy Jarlyqtan jáne Qazaqstan Respýblıkasynyń zańnamasynan týyndaıtyn ózge de máselelerdi sheshý Keńestiń ókilettikteri bolyp aıqyndalsyn.

5. Qazaqstan Respýblıkasynyń Úkimeti:

1. 2025 jylǵy 1 qarashaǵa deıin:

Keńes týraly erejeni bekitý;

joǵary basqarý organy Keńes bolatyn «Alatau City Authority» memlekettik qory (budan ári – ASA) nysanynda zańdy tulǵa qurý boıynsha sharalar qabyldasyn;

2) Alataý qalasynyń arnaýly mártebe sheńberinde memlekettik búdjet qarajaty men jeke kózder esebinen, onyń ishinde:

qalalyq keńistikti, ındýstrıalyq jáne arnaıy ekonomıkalyq aımaqtardy basqarýdyń tabysty halyqaralyq tájirıbesin endirý;

jetekshi halyqaralyq sarapshylardy, konsýltanttardy jáne joǵary bilikti kadrlardy tartý;

ınvestısıalar tartý maqsatynda Alataý qalasyn ilgeriletýge baǵyttalǵan is-sharalar ótkizýdi uıymdastyrý;

Alataý qalasyn damytýǵa qatysty Keńestiń, ortalyq jáne jergilikti memlekettik organdardyń barlyq prosesteri men sheshimderin iske asyrý jáne úılestirý arqyly jumys isteýin qamtamasyz etý ASA qyzmetiniń maqsaty dep aıqyndasyn;

3) 2025 jylǵy 31 jeltoqsanǵa deıin Qazaqstan Respýblıkasy Parlamenti Májilisiniń qaraýyna Alataý qalasynyń arnaýly mártebesiniń quqyqtyq negizderin aıqyndaýǵa baǵyttalǵan konstıtýsıalyq zań jobasyn engizsin, onda mynalar kózdelsin:

Alataý qalasynda jergilikti memlekettik basqarý organdaryn uıymdastyrýdyń, olardyń qurylymynyń, qyzmetin júzege asyrýynyń jáne ókilettikteriniń, onyń ishinde olardyń quqyqtyq aktiler shyǵarýynyń, quqyq normalaryn jáne/nemese ınovasıalyq jobalardy, sheshimderdi, servıster men tehnologıalardy synaqtan ótkizý maqsatynda shyǵarýynyń erekshelikteri;

klımattyq beıtaraptyqqa kóshýdi eskere otyryp, qalalyq ınfraqurylym men keńistikti basqarýdyń aqparattyq-kommýnıkasıalyq tehnologıalaryn jáne Zattar ınternetin (Smart City) ázirleýdi, endirýdi jáne paıdalanýdy retteý erekshelikteri;

obektilerdi jobalaý, qala qurylysy turǵysynan josparlaý jáne salý prosesterin, sondaı-aq sheteldik zańdy jáne jeke tulǵalardy qosa alǵanda, jeke kásipkerlik sýbektileriniń kórsetilgen salalarǵa ınvestısıa salýynyń quqyqtyq tetikterin retteý erekshelikteri;

Alataý qalasynyń aýmaǵynda ozyq halyqaralyq jáne sheteldik standarttardy, praktıkalardy, jikteýishterdi, tehnıkalyq reglamentterdi, sertıfıkattaý rásimderin, tehnıkalyq jáne tehnologıalyq normalardy taný jáne qoldaný prosesterin retteý erekshelikteri;    

turǵyn úı, kóshi-qon salasyndaǵy qatynastardy, eńbek qatynastaryn retteý jáne sheteldik, onyń ishinde joǵary bilikti jumys kúshin tartý erekshelikteri;

halyqaralyq ozyq praktıkalardy eskere otyryp, memlekettik satyp alý salasyndaǵy qatynastardy retteý erekshelikteri;

taýarlarǵa, jumystar men kórsetiletin qyzmetterge krıptofıat arnalary men retteletin steıblkoınderdi qoldana otyryp, aqy tóleý múmkindikterin qosa alǵanda, sıfrlyq aktıvterdiń aınalymyn retteý jáne olardyń bazasynda sıfrlyq qarjy servısterin endirý erekshelikteri;

tokendeý tehnologıalaryn qoldanýdy, ortalyqtandyrylmaǵan qarjynyń (DeFi) jáne ınternet-tehnologıalardyń (Web3) jumys isteýin retteý erekshelikteri;

jasandy ıntellekt jáne mashınalyq oqytý tehnologıalaryn qoldanýdy retteý erekshelikteri;

bilim berý, densaýlyq saqtaý, bıologıalyq tehnologıalar, medısınalyq jabdyqtardy shyǵarý jáne paıdalaný salasynda tehnologıalyq ınovasıalardy ázirleýdi, endirýdi jáne paıdalanýdy retteý erekshelikteri;

tómen bıiktiktegi ekonomıka salasyn (LAE) jáne qalalyq áýe utqyrlyǵyn (UAM) damytý sheńberinde robot tehnıkasy júıelerin, pılotsyz apparattardy, elektr ushý apparattaryn (eVTOL) shyǵarýdyń tehnologıalyq ınovasıalaryn ázirleýdi, endirýdi jáne paıdalanýdy retteý erekshelikteri;

jer qatynastaryn, tabıǵı resýrstardy paıdalaný jáne qorshaǵan ortany qorǵaý salasyndaǵy qatynastardy retteý erekshelikteri;

qala aýmaǵynda arnaıy ekonomıkalyq aımaq qurýdyń, uıymdastyrýdyń jáne onyń jumys isteýiniń, kreatıvti ındýstrıa men oıyn qyzmetiniń erekshelikteri;

jaýapkershilikti retteý erekshelikteri;

ınvestısıalaý jaǵdaılarynyń turaqtylyǵyna, ınvestısıalardy qorǵaýǵa jáne kapıtal qozǵalysynyń erekshelikterin retteýge kepildik berý;

salyq salýdyń jáne búdjettik qatynastardyń aıryqsha rejımin qoldaný;

Almaty aglomerasıasy sheńberinde Alataý qalasynyń, Almaty oblysynyń jáne Almaty qalasynyń kelisilgen damýy boıynsha, onyń ishinde kólik-logıstıka baılanystary, komýnaldyq jáne energetıkalyq ınfraqurylym, kóshi-qon saıasaty máselelerindegi qatynastardy retteý;

Alataý qalasynyń arnaýly mártebe jaǵdaıynda jumys isteýi maqsattaryna qol jetkizýge baǵyttalǵan ózge de erekshelikter;

4) 2026 jylǵy 1 qyrkúıekke deıin Alataý qalasynyń arnaýly quqyqtyq rejımin «Astana» halyqaralyq qarjy ortalyǵy qyzmetiniń rejımin keńeıtý jáne ınvestısıalardy quqyqtyq qorǵaýdyń ınstıtýsıonaldyq tıimdiligin aıtarlyqtaı arttyratyn basqa da sharalar esebinen odan ári jetildirý jóninde usynystar ázirlesin jáne engizsin;

5) Alataý qalasyn damytýǵa ınvestorlardy, jekeshe jáne egemendi ınvestısıalyq qorlardy keńinen tartý, onyń ishinde jekelegen halyqaralyq sharttar jasasý sheńberinde tartý boıynsha sharalar qabyldasyn.

6. Qazaqstan Respýblıkasynyń Úkimeti Qazaqstan Respýblıkasynyń Bas prokýratýrasymen, Qazaqstan Respýblıkasynyń Ulttyq bankimen jáne Keńespen birlesip, 2026 jylǵy 1 qyrkúıekke deıin ortalyq jáne jergilikti memlekettik organdardyń, sondaı-aq kvazımemlekettik sektor sýbektileriniń oryndaýy úshin mindetti bolatyn Alataý qalasynyń arnaýly mártebesiniń quqyqtyq rejıminiń jumys isteýi tujyrymdamasyn bekitsin.

7. Alataý qalasynyń arnaýly mártebe jaǵdaıynda damýy prosesterin úılestirýdi kúsheıtý maqsatynda Qazaqstan Respýblıkasynyń Úkimeti jáne Almaty oblysynyń ákimi:

1) «Alatau» arnaıy ekonomıkalyq aımaǵynyń basqarýshy kompanıasy» jaýapkershiligi shekteýli seriktestiginiń jarǵylyq kapıtalyna qatysý úlesterin ıelený jáne paıdalaný quqyqtaryn ASA-ǵa berý boıynsha sharalar qabyldasyn;

2) qurylatyn ASA-men «Alatau» arnaıy ekonomıkalyq aımaǵynda josparlanatyn jobalardyń, Alataý qalasynyń sheginde júzege asyrylatyn ındýstrıalyq-ınnovasıalyq, ınvestısıalyq jobalardyń, memlekettik-jekeshelik áriptestik jáne qurylys salý jobalarynyń Alataý qalasynyń strategıalyq jáne ózge de qala qurylysy qujattaryna sáıkestigi turǵysynan kelisilýin qamtamasyz etý boıynsha sharalar qabyldasyn;

3) Alataý qalasynyń qujattaryna ınvestısıalar tartý, iskerlik belsendilik pen ınovasıalardy damytý máseleleri boıynsha, sondaı-aq onyń arnaıy mártebesine baılanysty ózge de qujattarǵa Keńespen kelisilmesten ózgerister men tolyqtyrýlar engizýdi bolǵyzbasyn jáne jumys istep turǵan ári jańadan ornalastyrylatyn barlyq obektiler jobalary boıynsha Keńes sheshimderiniń qatań saqtalýyn qamtamasyz etsin;

4) 2026 jylǵy 1 qańtarǵa deıin qurylatyn ASA-men birlesip, Alataý qalasynyń bas jospary sheńberinde 2025 – 2026 jyldary Alataý qalasynyń negizgi damý aımaqtarynda salynatyn birinshi kezektegi ınfraqurylym obektilerin aıqyndasyn jáne olardy qajetti qarjylandyrýmen, onyń ishinde memlekettik-jekeshelik áriptestik jáne «tolyq bitirip beriletin» qurylys obektilerin qarjylandyrý tetikteri arqyly qamtamasyz etsin, ol úshin barlyq qajetti qujattar men sheshimderdi ázirlesin jáne bekitsin;

5) Alataý qalasyndaǵy birinshi kezektegi obektilerdi jobalaý jáne salý prosesinde zamanaýı halyqaralyq qurylys normalaryn, qaǵıdalary men standarttaryn tikeleı qoldaný boıynsha sharalar qabyldasyn.

8. Qazaqstan Respýblıkasynyń Bas prokýratýrasy memlekettik organdardyń, mekemelerdiń, uıymdardyń, laýazymdy jáne ózge de ýákiletti tulǵalardyń osy Jarlyqty jáne Qazaqstan Respýblıkasynyń Alataý qalasynyń arnaýly mártebesi týraly zańnamasyn oryndaý boıynsha aktileriniń, áreketteriniń (áreketsizdiginiń) zańdylyǵyn qadaǵalaýdy qamtamasyz etsin.

9. Qazaqstan Respýblıkasynyń Úkimeti, ortalyq jáne jergilikti atqarýshy organdar, sondaı-aq Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdar óz qyzmetinde Alataý qalasyn damytýǵa baılanysty barlyq máseleler boıynsha osy Jarlyqty basshylyqqa alsyn jáne odan týyndaıtyn ózge de sharalardy qabyldasyn.

10. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

11. Osy Jarlyq qol qoıylǵan kúninen bastap qoldanysqa engiziledi.