Osydan 2 apta buryn Topar aýylynda sibir jarasy anyqtalǵanyn habarlaǵanbyz.
Endi 15 kúnge sozylǵan karantın de kireberiste turǵan baǵana da alynyp tastaldy, dep habarlaıdy Almaty-akshamy.kz
Aýyl sharýashylyǵy mınıstrligi Veterınarıalyq baqylaý komıtetiniń Qaraǵandy oblystyq ınspeksıasy aýylda karantınniń alynyp tastalǵany týraly qaýlynyń kúshine engenin málimdedi.
Aýylda sibir jarasy anyqtalǵannan keıin osy aralyqta adam da, mal da aýyrmaǵan. Qazirgi tańda aýyldaǵy barlyq mal basyna sibir jarasyna qarsy ekpe egilgen. Sarapshylar ınfeksıa kózin áli izdestirýde.
«Maldyń aýrýdy jem-shóp arqyly juqtyrýy múmkin degen nusqa bar. Óıtkeni qojaıyndary maldaryn jaılaýǵa shyǵarmaǵan. Biz synaq úshin birneshe jem úlgilerin jiberdik. Synaq nátıjesin kútemiz», – dedi Aýyl sharýashylyǵy mınıstrligi Veterınarıalyq baqylaý komıtetiniń Qaraǵandy oblystyq ınspeksıasy basshysynyń orynbasary Danıar Merǵazın.