Almaty qalasynyń ákimi Baqytjan Saǵyntaev «Almaty» telearnasyndaǵy «Akimat LIVE» baǵdarlamasy barysynda Almatynyń damýyna qatysty shahar turǵyndarynyń, BAQ ókilderiniń saýaldaryna jáne áleýmettik jeli arqyly kelgen oqyrman suraqtaryna jaýap berdi, dep habarlaıdy almaty-akshamy.kz
SURAQ:
– Biz Almaty qalasynyń Alataý aýdanyna qarasty «Radýga» saıajaıynyń turǵyndarymyz. Bizge 2018 jyly káriz júıesi júrgizilgen bolatyn, sý berildi. Káriz júıesi bolsa áli kúnge paıdalanýǵa berilgen joq. Merdigerler nysandy «Almaty Sý»-ǵa tapsyrdyq deıdi, olar bolsa, qabyldaǵan joqpyz dep otyr. Bir-birine silteıdi.
Ekinshi másele, jaryqtandyrý jaıynda. Bizdiń kósheler qarańǵy. Kámelettik jasqa tolmaǵan balalar kóp. Oqý bastalsa, jolǵa deıin 200 metr júrýleri kerek bolady. Osy saýaldarymyzǵa jaýap berseńiz...
Bul saýalǵa jaýap berý úshin Alataý aýdanynyń ákimi Azamat Qaldybekov efırge onlaın qosyldy:
– Birinshi suraq boıynsha, «Radýga» saıajaıynda «Agıdel» kompanıasy sý jáne káriz júıelerin júrgizgen bolatyn. Sý turǵyndarǵa tolyq jetkizildi, alaıda káriz júıesin qosý úshin sorǵy stansıasyn salý kerek. Bul baǵytta qalalyq energotıimdilik basqarmasy jobalyq-smetalyq qujattar daıyndap jatyr. Bizdiń josparymyzdaǵy 17 káriz sorǵy stansıalarynyń ishine kirip otyr.
B.SAǴYNTAEV:
– Jaryq máselesi boıynsha saıajaılardy qarastyrmaǵan bolatynbyz. Alataý aýdanynda jaryǵy joq kóshelerdiń barlyǵy jaryqtandyryldy, jartylaı jaryǵy joq kóshelermen jumys isteýdemiz. Osy jumystar aıaqtalǵannan keıin saıajaılarǵa da kirisetin bolamyz.
SURAQ:
– Men balalar úıiniń túlegimin. Jasym 34-te. 29 jasqa deıin zań júzinde jetimder qataryna ene almaı, baspanaǵa kezekke tura almadym. Qazir de múmkindik bolmaı otyr. Maǵan kómektesýińizdi suraımyn. Qaı jerge tirkeletinimdi bilmeımin, baspanam joq. Meni Abaı men Saın kóshesi qıylysyndaǵy «Jastar úıinen» 29 jasqa tolǵannan keıin shyǵaryp jibergen. Kámelet jasqa tolmaǵan eki balam bar.
B.SAǴYNTAEV:
– Siz ózińizdiń jeke aqparattaryńyzdy stýdıada qaldyryńyz, bizdiń qyzmetkerler sizge keıin habarlasady. Kómektesemiz.
SURAQ:
– Medeý aýdanynda «Shırokaıa shel» aýmaǵynda taýly aımaq bolǵandyqtan, ıay joldar jabyq. Joldyń úńireıip turǵanyna 10 jyldaı boldy. Biz ony ornyna keltire almaı otyrmyz. Qalalyq mobıldilik basqarmasy ózderińizdiń qarajattaryńyzdan jasańyzdar deıdi, alaıda taýly aımaq jeri qalaǵa kiredi ǵoı.
B.SAǴYNTAEV:
– Onda shynymen de qulaǵan 2-3 joldar bar. Baý-baqsha seriktestigi bolǵandyqtan, biz onda jumystar júrgizbedik. Biraq adam ómirine qaýip tóndiretindeı jaǵdaı bolsa, qarastyryp kórý kerek.
SURAQ:
– Qonaev pen Maqataev kósheleriniń qıylysynda eski, qýraǵan terek tur. Sizge eki ret hat jazdym. Máseleni sheshý úshin ózińizdiń atyńyzdan, ákimshilikten komısıa jiberýdi suraımyn.
B.SAǴYNTAEV:
– Jaqsy, erteń tekserýge mamandar jiberemin. Shynymen apatty jaǵdaıda tursa, tıisti sharalar qolǵa alynady.
SURAQ:
– Tóle bı kóshesinde ne bolyp jatyr? Ne úshin ony qaıta qazyp jatyr? Jóndeý jumystary qashan bitedi eken?
B.SAǴYNTAEV:
– Tóle bıdegi bir jolaq qoǵamdyq kólikterge arnalǵan. Baıtursynov kóshesinen Áýezov kóshesine deıin eki jolaq. Bireýi – qoǵamdyq kólikterge, ekinshisi – qalalyq kólikterge arnalǵan. Biz osy aýmaqtaǵy relsti alyp, asfált tósep, keńeıtpekshimiz. Relstiń janyna bordúr qoıamyz. Sonda kósheniń eki jaǵynda da 3 jolaqtan bolady. Qazirgi jóndeý jumystary tek osy ýchaskede ǵana júrip jatyr. Biz joldy úsh ýchaskege bólip tastaǵanbyz. Qazir úsheýinde de jumystar júrip jatyr. Tolyq jumystar qazan aıyna deıin aıaqtalýy kerek. 8 shaqyrym joldy biz ortasha jóndeý jumystarymen jabamyz. Keıbir bordúrlardy aýystyramyz, aryq júıesi de qalpyna keltiriledi. Qalaı bolsa solaı ornalasqan turaqtar bar. Osy kóshedegi qıylystardyń ózi qaýipti. «Saıran» avtobeketiniń mańy da joldan ótýge óte qaýipti. Osy mańaıdaǵy jumystardyń bári durys uıymdastyrylmaǵan. Kóshege júrgizilip jatqan ortasha jóndeý jumystary kezinde bulardyń bárin retke keltiremiz. Sońǵy ret Tóle bıge 2013 jyly jóndeý jumystary jasalǵan.
SURAQ:
– «Kólsaı» yqshamaýdany, Qoıgeldi 34, 25-úıge kómek kerek. 16 tamyz kúni sel júrip, meniń úıimniń aldyn sel basyp qaldy. Kesheli beri Medeý aýdanynan eki adam kelip, tazalap, búgin de kelemiz degen, biraq eshkim kelmedi. Bizge kim kómek beredi, sony aıtsańyzdar...
B.SAǴYNTAEV:
– Komısıa baryp, kórip, kómektesedi. Máseleńiz sheshiledi.
SURAQ:
– Alataý aýdanyndaǵy Saraıshyq kóshesinde turamyn. Bizdiń jer úılerge kanalızasıa qashan júrgiziledi? Odan keıin Kókózek aýylyna 81 avtobýs kiredi dep edi. Ol qaı kezde kiredi?
Bul saýalǵa jaýap berý úshin Alataý aýdanynyń ákimi Azamat Qaldybekov efırge onlaın qosyldy:
Saraıshyq eldimekeni «Alǵabas» yqshamaýdanyna kiredi. Shýlanova, 109 mekenjaıy boıynsha Saraıshyq kóshesinde magıstraldy káriz júıesi bar. Tehnıkalyq shartty alyp, 9000 teńge tólep, qosyla alasyzdar. Bolmasa biz erteń sizdiń mekenjaıǵa shyǵyp, túsindirme jumystaryn júrgizemiz.
Al Kókózek boıynsha qalalyq mobıldilik basqarmasymen birlese otyryp jumystar júrgizildi. Marshrýt jelilerin ońtaılandyrý baǵdarlamasy boıynsha jańadan keletin avtobýstar sanynan sol jaqqa jańa marshrýt shyǵaramyz degen jospar bar.
B.SAǴYNTAEV:
– Keshe keńes ótkizdik. Qoǵamdyq kólikke qatysty suranys ta, talap-tilek te kóp. Munyń bári erteń avtobýstyń jetispeýshiligine alyp keledi. Bul salady júıesizdik oryn almas úshin budan bylaı suranystardyń bárin bir júıege keltirý jumystary júrgizilýde.
SURAQ:
– Meni Gogol kóshesi men Jibek joly dańǵyly aralyǵyndaǵy jaǵdaı alańdatady. Jańbyr jaýǵan kezde bizdiń jerasty jolyn sý basyp qalady. Sońǵy ret men Almaly aýdany ákimdigine habarlasqanmyn. Álgi jerdiń lastyǵy sonsha, sońǵy kezderi egeýquıryqtar paıda bolypty. Koronavırýsqa qosa endi egeýquıryqtar jetpeı tur edi. Kóshege sanıtarlyq óńdeý jasalýy kerek.
B.SAǴYNTAEV:
– Jibek joly dańǵylynda qaýipti burylys bar, sol jerdi sý basyp qalǵany belgili. Al egeýquıryqtar jaıly aqparat buǵan deıin bolmaǵan. Siz aıtqan mekenjaıǵa jaýapty organ mamandary búgin baryp, tekserip, erteń tazalyq, sanıtarlyq óńdeý jumystary júrgiziledi.
TÚIİN.
«Akimat LIVE» baǵdarlamasynyń kezekti shyǵarylymyn qorytyndylaı kele, Baqytjan Saǵyntaev almatylyqtardy tolǵandyrǵan suraqtardyń barlyǵy jaýapsyz qalmaıtynyn qadap aıtty. Turǵyndar talap-tilegi ákimdiktiń basty nazarynda bolady jáne júıeli túrde oń sheshimin tabatyn bolady. Sonymen qatar, shahar basshysy koronavırýs ınfeksıasy taralýynyń aldyn alý úshin qala turǵyndaryn adam aıaǵy kóp jınalatyn qoǵamdyq oryndarǵa, jıyn-toılarǵa barmaýǵa, qazirgi epıdahýalǵa baılanysty kópshilikti saqtyq sharalaryna barynsha jaýapkershilikpen qaraýǵa shaqyrdy. İndetti aýyzdyqtaý – óz qolymyzda. Belsendi ekpe alýdan basqa jol joq. Ekpe alý – indetke tosqaýyl qoıýdyń birden-bir joly.
«Akimat LIVE»-ta kezekshilik etkender: Quralaı IMANBEKQYZY, Ásel DAǴJAN, Dınara MURAT.