Qaraǵandy ındýstrıalyq ýnıversıtetiniń bazasynda «Injenerlik eńbektiń bedelin arttyrýdaǵy ǵylymnyń róli» taqyrybynda Respýblıkalyq ǵylymı-praktıkalyq konferensıa ótti, dep habarlaıdy aqshamnews.kz
QR Ulttyq ınjenerlik akademıasynyń qoldaýymen uıymdastyrylǵan bul is-shara ınjener mamandyqtarynyń mártebesin arttyrýdaǵy ǵylymnyń mańyzdylyǵyna, ǵylym, bıznes jáne bilim berý arasyndaǵy yntymaqtastyqqa, sondaı-aq jastardyń ınjenerlik mamandyqtarǵa degen qyzyǵýshylyǵyn arttyrýǵa arnaldy.
Qaraǵandy ındýstrıalyq ýnıversıtetiniń Basqarma tóraǵasy – rektory Bahyt Jáýtikov:
«Bizdiń ýnıversıtetimiz bilim berýmen qatar ǵylymı qyzmetpen de belsendi aınalysyp, ǵylymdy nasıhattaýǵa zor úles qosyp keledi. Qazaqstanda 35 jyldan beri Ulttyq ınjenerlik akademıa tabysty jumys jasap keledi. Onyń prezıdenti – belgili memleket jáne qoǵam qaıratkeri Baqytjan Jumaǵulov búgin bizge qurmetti qonaq retinde kelip otyr. Sondaı-aq elimizdiń túkpir-túkpirinen delegasıa músheleri keldi. Olardyń qatarynda jas ǵalymdar, óndiris oryndarynyń ókilderi bar. Árıne, bul jerde bizge jaqyn Qarmet, QazTehna, İńkár-1 jáne basqa da kásiporyndardyń ókilderi de bar», – dedi.
Konferensıa aıasynda qatysýshylar Qarmet zaýytyna ekskýrsıa jasap, shıkizatty óńdeýden bastap daıyn ónim shyǵarý prosesine deıingi tehnologıalyq úderistermen tereńirek tanysty. Zaýytqa sapar barysynda konferensıa qatysýshylary metalýrgıa salasynyń damý perspektıvalaryn, sondaı-aq ǵylym men óndiristiń ózara is-qımylyn talqylady. Ýnıversıtette sondaı-aq ǵylymı jobalar kórmesi uıymdastyryldy. Qatysýshylar ınjenerıanyń túrli aspektilerine arnalǵan ǵylymı baıandamalar men zertteýlerin usyndy. Olar ǵylym men tehnologıanyń qazirgi jetistikteri men damý keleshegin talqylady.
QR Ulttyq ınjenerlik akademıasynyń Prezıdenti Baqytjan Jumaǵulov seksıalardyń jumysyna joǵary baǵa berdi. Onyń aıtýynsha, seksıa otyrystary joǵary deńgeıde uıymdastyrylyp, mazmundy baıandamalar usynyldy. Sonymen qatar ol kórmeni aralap kórip, ǵylymı jetistiktermen tanysty.
«Ǵylym Temirtaýǵa keldi. Bul – tek sımvoldyq qadam emes, naqty isterdiń bastamasy. Biz osy ázirlemelerdiń praktıkada qoldanylýyna bar kúshimizdi salamyz», – dedi Baqytjan Tursynuly.
Bul kúni Qaraǵandy ındýstrıalyq ýnıversıtetinde QR Ulttyq ınjenerlik akademıasynyń fılıalynyń ashylýy mańyzdy oqıǵa boldy. Bul – Qazaqstanda ǵylymı-ınjenerlik qyzmetti úılestirip, damytyp otyrǵan bedeldi ári iri birlestik. QarIÝ-degi Akademıa fılıaly ýnıversıtettiń ǵylym nátıjelerin tájirıbege engizý, óndiris jáne bıznespen tıimdi ıntegrasıa, naryqtyń keleshektegi tehnologıalyq talaptaryn qanaǵattandyrý baǵytynda múlde jańa deńgeıge kóterilýin qamtamasyz etedi.
Plenarlyq otyrys sońynda ǵylymı qyzmettegi joǵary jetistikteri úshin QarIÝ ǵalymdary, oqytýshylary men qyzmetkerlerin saltanatty marapattaý rásimi ótti.