Almaty qalasynyń ákimi Erbolat Dosaev Polısıa departamentiniń qyzmetkerleri men olardyń otbasylarylaryna uıymdastyrylǵan Naýryz meıramyna qatysty.
Sońǵy úsh jyl ishinde Almaty ákimdigi azamattardyń qaýipsizdigin qamtamasyz etetin mańyzdy qurylymdyq mekemeniń biri retinde polısıanyń damýyna erekshe kóńil bólip keledi. Atap aıtqanda, Almaty ákimine jergilikti búdjet qarajatyna satyp alynǵan jańa tehnıka men tolyqtaı jóndeýden ótken ákimshilik ǵımarat tanystyryldy. Bul ǵımarat Almaty ákimdigi tarapynan jeke menshik ıesinen 1,7 mlrd teńgege satyp alynyp, ótken jyldyń qyrkúıek aıynda polısıa balansyna berilgen edi. Búginde bul ǵımarat shamamen 300 qyzmetkerge qolaıly jumys jaǵdaı jasap otyr jáne Polısıa departamentiniń negizgi ǵımaratyna jaqyn ornalasqan, bul quqyq qorǵaýshylardyń jumysyn jedeldetýge yqpal etedi.
Bul Almaty polısıasynyń materıaldyq-tehnıkalyq bazasyn nyǵaıtý jáne qoǵamdyq qaýipsizdik júıesin jańǵyrtý boıynsha júrgizilip jatqan aýqymdy baǵdarlamanyń bir bóligi.
Shahar basshysy qoǵamdyq qaýipsizdik júıesin nyǵaıtý qala saıasatynyń basym baǵytynyń biri bolyp qala beretinin atap ótti. Óz kezeginde Polısıa departamentiniń basshylyǵy kórsetilip jatqan qoldaý úshin alǵys bildirdi.
Aıta ketý kerek, Almatyda qoǵamdyq qaýipsizdik salasynda ozyq sheshimder engizilip jatyr. Erbolat Dosaevtyń tapsyrmasyna sáıkes, qaladaǵy memlekettik mektepter men balabaqshalarda keshendi qaýipsizdik júıesi júzege asyrylýda, sondaı-aq jasandy ıntellekt elementteri bar beınemonıtorıng belsendi qoldanylyp otyr. Bıyl jyl sońyna deıin Biryńǵaı beınebaqylaý júıesine qosylǵan kameralar sany 70 myńǵa deıin ulǵaıtylady.
Sonymen qatar, sapar barysynda Memleket basshysynyń tapsyrmasymen Erbolat Dosaev polısıa kapıtany Qarashash Esdáýletovaǵa páter sertıfıkatyn tabystady. Ol Dýbaıda ótken UAE SWAT Challenge 2025 halyqaralyq týrnırinde júldeger atandy. Onyń komandasy álemniń eń úzdik arnaıy bólimsheleri arasynda ekinshi oryn ıelendi.
Aıta keteıik, Qarashash Esdáýletova Qazaqstan İİM-niń alǵashqy áıelder komandasy — «Tomırıs» quramynda óner kórsetti. Bul komanda osy bedeldi jarysqa alǵash ret qatysyp, beıresmı túrde arnaıy jasaqtyń «Olımpıadasy» sanalatyn, álemniń elıtalyq taktıkalyq bólimshelerin jınaıtyn týrnırde baq synady.