Temirtaýda jyl saıyn aýaǵa 300 myń tonnadan asa zıan zat taraıdy. Onyń negizgi bóligi Qaraǵandy metalýrgıa kombınatyna tıesili. Bul týraly Klımattyń ózgerýi men jasyl energetıka jónindegi Ortalyq Azıaǵa arnalǵan jobalyq keńse málimdedi, - dep habarlaıdy aqshamnews.kz tilshisi.
Temirtaý - Qazaqstandaǵy eń las qalalardyń biri. Halqy 200 myń adamǵa jetpese de, aýaǵa taraıtyn óndiristik qaldyqtardyń mólsheri óte joǵary.
"Temirtaý qalasy - Qazaqstandaǵy aýa sapasyn eń kóp lastaıtyn eldi mekenderdiń biri. Sońǵy on jyl ishinde qalada atmosferanyń "joǵary" deńgeıde lastanýy turaqty túrde baıqalyp keledi. Jyl saıyn Temirtaý atmosferasyna shamamen 305 myń tonna ónerkásiptik shyǵaryndy taraıdy, olardyń negizgi bóligi qala quraýshy kásiporyn - Qaraǵandy metalýrgıa kombınatyna tıesili", - delingen habarlamada.
Salystyrý úshin aıtar bolsaq, máselen halqy 2,3 mıllıonnan asatyn Almatyda aýaǵa 232 myń tonna ónerkásiptik qaldyq taraıdy.
Jobalyq keńseniń aqparatynsha, Temirtaýdaǵy ónerkásiptik shyǵaryndylardyń 80%-dan astamy "Qarmet" AQ-ǵa tıesili. Zaýyttan aýaǵa shyǵatyn negizgi zıandy zattar mynalar: azot pen kúkirt dıoksıdteri, fenol, amıak, kómirtek totyǵy, kúkirtsýtek.
Qazgıdromet málimetinshe, Temirtaýda 2015 jyldan beri aýa sapasy "joǵary deńgeıde lastanǵan" dep baǵalanyp keledi. 2023 jyly zıandy zattar shekti normadan 5 879 ret, 2024 jyly 1 414 ret asyp ketken.