21-22 qarasha aralyǵynda Qazaq ulttyq qyzdar pedagogıkalyq ýnıversıtetinde «Tech QyzPU Niğde Hack: AI jáne jumysshy mamandyqtar» taqyrybynda halyqaralyq hakaton ótti.
İs-shara Memleket basshysy Qasym-Jomart Toqaevtyń jumysshy mamandyqtarynyń bedelin arttyrý jónindegi bastamasyn qoldaý maqsatynda uıymdastyrylyp otyr. Sonymen qatar hakaton Prezıdenttiń jyl saıynǵy Joldaýynda kórsetilgen sıfrlandyrý men jasandy ıntellektti damytýǵa qatysty tapsyrmalardy júzege asyrýǵa úles qospaq.
Joba Túrkıa Respýblıkasynyń Nııde Ómer Halısdemır ýnıversıteti jáne Nııde tehnoparkimen jasalǵan ekijaqty kelisim aıasynda ótti.
Hakatonnyń ashylýynda Basqarma Tóraǵasy – Rektor mindetin atqarýshy Sábıt Sýataı sóz sóılep, sharanyń mańyzdylyǵyna toqtaldy.
«Hakaton – saıys qana emes, ınovasıa men shyǵarmashylyqtyń merekesi. Bizdiń ýnıversıtet jasandy ıntellekt, sıfrlyq pedagogıka, IT jáne EdTech baǵyttarynda mańyzdy jobalardy júzege asyryp keledi. Sondyqtan bul hakaton bizdiń strategıalyq maqsattarymyzǵa tolyq saı keledi», – dedi Sábıt Qurmanjanuly.
24 saǵattyq jarystyń basty maqsaty – qysqa merzim ishinde toptyq jumys arqyly ınovasıalyq baǵdarlamalyq sheshimder ázirleý. Bıylǵy dodaǵa elimizdegi onǵa jýyq joǵary oqý ornynan jıyrma alty komanda qatysty. Uıymdastyrýshylar barlyq qatysýshyny joǵary jyldamdyqty ınternetpen, jumys oryndarymen, elektr qýatymen qamtamasyz etip, tamaq pen sýsyndardy tegin usyndy.
«Biz bul sharany tek jarys retinde emes, jańa kezeńge bastaıtyn, jańa múmkindikterge jol ashar baspaldaq dep qaraımyz. Sondyqtan da hakatonǵa qatysqan árbir qatysýshyny jeńimpaz dep esepteımiz. Osy sharanyń arqasynda alda talaı jeńisterdiń esigi ashylady degen oıdamyn. Nııde Ómer Halısdemır ýnıversıteti tarapynan da ortaq jobalardy júzege asyrý úshin qadamdar jasalyp jatyr», – dedi Nııde Ómer Halısdemır ýnıversıteti, Kompúter jáne aqparattyq ǵylymdar fakúltetiniń dekany, doktor Alper Aıtekin.
Hakatonnyń sońynda komandalar óz jobalaryn QyzPU, Nııde Ómer Halısdemır ýnıversıteti jáne Nııde tehnoparkiniń ókilderinen turatyn qazylar alqasyna usyndy. Baǵalaý nátıjesinde birinshi orynǵa Qazaq ulttyq qyzdar pedagogıkalyq ýnıversıtetiniń «NSA» komandasy ıe boldy. Ekinshi orynǵa eki komanda – Ǵumarbek Dáýkeev atyndaǵy Almaty energetıka jáne baılanys ýnıversıtetiniń jáne Muhametjan Tynyshbaev atyndaǵy ALT ýnıversıtetiniń komandasy laıyq dep tanyldy. Al úshinshi oryn M.H. Dýlatı atyndaǵy Taraz ýnıversıtetiniń, Almaty Tehnologıalyq Ýnıversıtetiniń jáne QyzPU komandalaryna berildi.
Jeńimpaz atanǵan Qazaq ulttyq qyzdar pedagogıkalyq ýnıversıtetiniń «NSA» komandasy óz qýanyshtarymen bólisti:
«Aldyńǵy jyly da qatysyp, 3-oryndy ıelengen edik. Bıyl qaýipsizdik máselesi ózekti bolǵandyqtan, osy keısti tańdadyq. Úsheýmiz mindetterdi ózara bólisip alyp, 24 saǵat boıy bar kúshimizdi salyp jumys istedik. Aldaǵy ýaqytta jasandy ıntellekt baǵytynda tájirıbemizdi odan ári damytqymyz keledi. Túrkıaǵa budan da jaqsy daıyndyqpen barýdy josparlap otyrmyz. Ýnıversıtetimizdiń atyn shyǵaryp, úlken jetistikterge jetemiz dep senemiz», – dedi top múshesi, 4 kýrs stýdenti Nazerke Turǵanbek.
Jeńimpazdarǵa qarjylaı sertıfıkattar tabystalyp, birinshi oryn ıegerine qosymsha Túrkıadaǵy Nııde tehnoparkiniń akselerasıalyq baǵdarlamasyna qatysý sertıfıkaty usynyldy.
