Almatyda 3000 spektákl sahnalanyp, 700 myń kórermen spektáklge barǵan
Teatr artıseri maýsymdy sátti aıaqtap, demalysqa shyqty. Mádenı astanada ónersúıer qaýym úshin 3000-ǵa jýyq spektákl sahnalanǵan, onyń 52-si premera.
Almatyda dramalyq, operalyq jáne balettik qoıylymdarǵa 700 myńnan astam kórermen kelgen. Bul qala ákimdigine, sondaı-aq Mádenıet jáne aqparat mınıstrligine qarasty on memlekettik teatrdyń kórsetkishi.
Aıta keteıik, Memlekettik qýyrshaq teatry 88-shi maýsymynda kórermenderge 1200 spektákl usynyp, 82 myńnan astam kórermen qabyldaǵan. Teatr ujymy Kanada astanasynda The First international Ottawa Puppet festival halyqaralyq festıváldiń bas júldesin jeńip alyp, maýsymdyúlken jeńispen aıaqtady. Aıta keteıik, bıyl ákimdik 10 jylda alǵash ret teatr ǵımaratyn jańǵyrtyp, jóndeý jumystaryn júrgizdi. Kelesi maýsymda óner ujymy 90 jyldyq mereıtoyn atap ótedi.
Almatydaǵy jas teatrdyń biri – «Alataý» dástúrli óner teatry. Osy maýsymda teatr artıseri kórermenderge 76 spektákl usynyp, ony 53 200 adam kórgen. Sonymen qatar, osy maýsymda «Alataý» DÓT artıseri Italıa, Aýstrıa jáne Qytaıda óner kórsetti.
Ǵ. Músirepov atyndaǵy Qazaq memlekettik akademıalyq balalar men jasóspirimder teatry osy maýsymda eń kóp kórermen jınady. Teatr sahnalaǵan qoıylymdardy 130 myńnan astam adam tamashalaǵan.
Respýblıkalyq memlekettik akademıalyq koreı teatry bıyl premeraǵa baı boldy. Teatr óz 92-shi maýsymynda kórermenderge 13 jańa qoıylym usynǵan.
Muhtar Áýezov atyndaǵy Qazaq ulttyq drama teatrynyń ujymy 98-shi maýsymda kórermenderge 199 spektákl usynǵan.
Jańa teatr maýsymy dástúrli túrde qyrkúıekte bastalady. Sol ýaqytqa deıin artıser tyń kúsh jınap, rejıserler jańa qoıylymdar josparlaıtyn bolady.