Qazaqstanda Memleket basshysynyń tapsyrmasyna sáıkes Úkimet qaýlysymen «Taza Qazaqstan» ekologıalyq mádenıetin damytýdyń 2024–2029 jyldarǵa arnalǵan tujyrymdamasy bekitildi. Bul qujat halyqtyń ekologıalyq mádenıetin qalyptastyrýǵa, tabıǵatty qorǵaýǵa degen jaýapkershilikti arttyrýǵa jáne qoǵamdy ekologıalyq máselelerdi sheshýge belsendi tartýǵa baǵyttalǵan.
Ekologıalyq mádenıet jáne saıasat departamentiniń dırektory Dáýlet Esmaǵambetovtiń aıtýynsha, tujyrymdama sheńberinde kógaldandyrý, abattandyrý, ekologıalyq konkýrstar, ekovolonterlik sharalar jáne halyqtyń ekologıalyq bilimin arttyrýǵa baǵyttalǵan is-sharalar júzege asyrylýda. Óńirlerde arnaıy is-qımyl josparlary qabyldandy.
Nátıjeler: bastamanyń iske qosylǵanynan beri myńnan astam ekologıalyq aksıa ótti; bıyldyń ózinde 767 is-shara uıymdastyrylyp, oǵan 10,4 mln adam qatysty, sonyń ishinde 586 myń erikti bar; jalpy 1,6 mln tonnadan astam qaldyq jınalyp, 859,6 myń gektar aýmaq tazartyldy; jyl saıyn 3 mln aǵash otyrǵyzý josparlanǵanymen, qazirdiń ózinde 4,7 mln aǵash otyrǵyzyldy, qalǵany kúzge josparlanǵan.
Qazaqstanda jyl saıyn 4,5 mln tonnadan astam turmystyq qaldyq túziledi, byltyr olardyń 25,8 paıyzy qaıta óńdelgen. Bul kórsetkishti arttyrý úshin 67 joba maquldanyp, 346,6 mlrd teńge qarastyryldy.
Qalalarda ekobokstar men fandomattar ornatylýda. Mysaly, Astana, Almaty, Aqtóbe jáne Óskemende plasık pen alúmını jınaıtyn 100-den astam fandomat jumys istep tur. Tamyz aıynyń sońyna deıin Astana men Jezqazǵannyń 129 mektebinde qoqysty bólek jınaýǵa arnalǵan 1000-nan astam ekoboks qoıylady.
Bul sharalar polıgondarǵa jiberiletin qaldyq kólemin azaıtyp, elde ekologıalyq mádenıetti nyǵaıtýǵa yqpal etpek.