Táýelsizdigimizdiń 30 jyldyǵy aıasynda uıymdastyrylǵan bul is-sharaǵa daryndy sýretshi Tańsyq Májıtovanyń 60-tan astam avtorlyq týyndysy usynyldy.
«Qazaqstan» ortalyq konsert zalynda elimizdiń kórnekti ókilderine arnalǵan «Táýelsizdik tulǵalary» kórkem portretter kórmesi ashyldy, dep habarlaıdy almaty-akshamy.kz QR Mádenıet jáne sport mınıstrliginiń baspasóz qyzmetine silteme jasap.
İs-sharanyń ashylý saltanatynda QR Mádenıet jáne sport mınıstri Aqtoty Raıymqulova: «Respýblıka jurtshylyǵynyń nazaryna usynylǵan portretterdiń bárin Tańsyq Majıtova natýradan salyp shyqty. Bul álemdik úrdistiń ózinde sırek kezdesetin qubylys», - dep erekshe atap ótti.
Portretterdi salý barysynda júzbe-júz syrlasý arqyly keıipkerleriniń harakterin, ishki jan-dúnıesin kórsetý – sýretshiniń zor eńbegi men tynymsyz izdenisiniń nátıjesi. Álemge áıgili skrıpkashy Aıman Musahodjaeva, áıgili kardıohırýrg Iýrıı Pá, Botaı mádenıetin zertteýshi ǵalym Vıktor Zaıbert, álem chempıony Serik Sapıev beıneleri sýretshiniń qapysyz jetistigin áıgilep turady.
Qazaq rýhynyń aldaspandary Ábish Kekilbaev, Farıza Ońǵarsynova, Gerold Belger, Aqseleý Seıdimbek, Eskendir Hasanǵalıev, Satybaldy Narymbetov tulǵalary sýretshiniń qyl qalamy arqyly el júreginde máńgilikke qaldy.
«Bul adamdar – el múddesin bıik qoıǵandar, shyn máninde, ultjandylyqtyń ozyq úlgisin kórsetkender. Táýelsiz Qazaqstannyń tuǵyrly tulǵalary jurtynyń jadynda, eliniń esinde máńgi saqtalady. Bul kórme budan bylaı da turaqty túrde ótkizilip turady, sondaı-aq ekspozısıalar búgingi tanymal tulǵalardyń portretterimen tolyqtyrylmaqshy», - dedi kórmeni uıymdastyrýshylardyń biri belgili jazýshy ári sýretshi Álibek Asqar.
Aıta keteıik, bul is-sharany QR Mádenıet jáne sport mınıstrliginiń qoldaýymen «Geraldıkalyq zertteýler ortalyǵy» uıymdastyrdy.