Elimizdiń azattyqqa qol jetkizgenine otyz jyldan asty.
Táýelsizdiktiń alǵashqy jyldarynda Keńes úkimetinen qalǵan tozyǵy jetken, tehnologıasy eskirgen óndiris oryndarynyń birtindep toqtaı bastaýy, onda jumys isteıtin mamandardyń azaıýy, azyq-túlik ónimderi men qajetti taýarlardyń, taǵy da basqa kóptegen dúnıelerdiń jetispeýshiliginen qıyn kezeńderdi bastan keshirdik.
Táýelsizdik jastarymyzdyń álemniń ozyq oqý oryndarynan bilim alyp, bilikti ǵalymdardan, kásipkerlerden, menedjerlerden, shyǵarmashylyq tulǵalardan sabaq alyp, tájirıbe almasyp jan-jaqty damýyna jol ashty. Qashanda el basshylarynyń úzdiksiz qoldaýyna ıe bolyp kele jatqan, elimizdegi kásibı mýzyka mamandaryn daıarlaıtyn biregeı joǵary oqý orny – Qurmanǵazy atyndaǵy Qazaq ulttyq konservatorıasy ónerli jastardy álemdik mádenıettiń kóshine ilestirýge, ulttyq ónerdi shetelderde barynsha nasıhattaýǵa erekshe múmkindik aldy. Óner-bilim ordasynyń oqytýshylary, bilim alýshylary men túlekteri túrli halyqaralyq konferensıalarǵa, jobalarǵa qatysyp, halyqaralyq baıqaýlar men festıváldarda, konsertterde óner kórsetip, ulttyq mýzykamyzdy nasıhattap, elimizdiń mereıin ósirip, álemdik akademıalyq mýzyka muralaryn jáne aspaptyq oryndaýshylyq ónerin joǵary deńgeıde meńgergendigin dáleldep keledi.
Atap aıtqanda, stýdenttik sımfonıalyq orkestrdiń Qazaqstan qalalarynda konserttik qoıylymdar kórsetýi, Ulybrıtanıadaǵy Barbican Hall konserttik zalynda, Italıanyń San Felıche Akademıasynda ótken «Ninth International Festival of European Youth Orchestras» atty jastar orkestri festıvalinde, Germanıanyń Berlın, Kassel, Frankenberg, Battenberg, Bonn qalalarynda ótken «Young Euro Classic» jáne «Kultursommer» halyqaralyq jastar orkestri festıvalinde óner kórsetýi, Qazaq ult aspaptar stýdenttik orkestriniń Qytaıǵa jáne Túrkıanyń Ankara, Stambýl qalalaryna gastróldik sapar jasaýy, Qyrymda ótken «Halyqaralyq ónerli jastar men stýdentter festıvaline» qatysýy, stýdenttik aralas hordyń Italıadaǵy Halyqaralyq hor ujymynyń «Mýzykalyq Venesıa-2009» festıvaline qatysýy, Stýdenttik kameralyq orkestrdiń Tájikstandaǵy Halyqaralyq «Bahorıstan» kameralyq orkestrler festıvaline qatysýy jáne konservatorıa pedagogtary men stýdenttik ujymdarynyń Almaty qalasyndaǵy respýblıka saraıynda, Astana qalasynyń konserttik zaldarynda, elimizdiń ózge óńirlerinde tabysty ujymdyq konsertter qoıýy, basqa da álemdik sahnalarda óner kórsetýi, mýzykatanýshy, ónertanýshy ǵalymdarymyz ben magıstrant jáne doktoranttarymyzdyń óz eńbekterin bedeldi halyqaralyq basylymdarda jarıalap, konferensıalarǵa qatysyp, sheteldik áriptesterin moıyndatýy – konservatorıanyń ǵylymı, oryndaýshylyq, shyǵarmashylyq áleýetin aıqyndasa kerek-ti. Osyndaı kásibı mýzykalyq bilim bazasymen «qarýlanǵan» konservatorıa bitirýshileri bolashaq mýzyka mamany retinde respýblıkanyń barlyq mýzykalyq ujymdarynda, konserttik uıymdar men oqý oryndarynda tabysty qyzmet etýde. Bul – el táýelsizdiginiń bizdiń joǵary oqý ornyndaǵy jetistigi.
Aqparattyq tehnologıalar barynsha damyp, túrli zıandy aqparattar azamattarymyzdyń sanasyn ýlap jatqan jahandaný zamanynda eldigimizge basty qaýiptiń qaıdan ekenin saralap, halqymyzdyń ulttyq bolmysyn, rýhanı saýlyǵyn, birligin saqtaý asa mańyzdy másele bop tur. Táýelsizdigimiz barda – ondaı baǵyttaǵy sharýalardy jasaý múmkindigi óz qolymyzda. Memleket bolmaq túgili ulttyǵyn saqtaı almaı jutylyp ketken, joǵalyp bara jatqan etnostar qanshama?! Táýelsizdiktiń baıandy bolýynyń basty kepili – aýyzbirlik, tynyshtyq pen beıbitshilik. «Baq qaıda barasyń, yntymaqqa baramyn» deıdi atadan qalǵan asyl sóz. Úzdiksiz damý ústindegi qazirgi zamanda Táýelsizdigimizdi nyǵaıtyp, azamattarymyzdyń rýhanı-ıntellektýaldyq áleýeti men ál-aýqatyn kóterip, básekege qabiletti, damyǵan elder qataryna qosylyp, sol bıigimizden túspeı, basqalarǵa úlgi bolarlyq jaǵdaıǵa jetý úshin el erteńine alańdaıtyn árbir azamat meılinshe osy qundylyqtardy saqtap, urpaqtan-urpaqqa qaımaǵyn buzbaı jetkizý úshin aıanbaı atsalysýy kerek dep esepteımin. Táýelsizdigimiz tuǵyrly, bolashaǵymyz jarqyn bolsyn!