Qazaqstan Respýblıkasy Prezıdenti janyndaǵy Ulttyq quryltaı múshesi, QR Parlamenti Májilisiniń VI shaqyrylym depýtaty Shaımardan Nurymov:
– Bul kún árbir qazaqstandyqtyń ómirinde erekshe mańyzǵa ıe. Ol bizdiń egemen elimizdiń qýatty, derbes jáne táýelsiz memleket retinde jetken tabystarynyń sımvolyna aınaldy. Qazaqstannyń halyqaralyq arenadaǵy bedeli artyp, pikirine qulaq asatyn elge aınalǵanyn kórsetedi.
Táýelsizdik jyldarynda biz óz Konstıtýsıamyzdy qabyldap, zańdarymyzdy bekittik, turaqty ekonomıka qurdyq. Kórshi eldermen memlekettik shekaramyzdy delımıtasıaladyq, qýatty ásker jasaqtadyq jáne álemniń ártúrli elderimen tabysty saýda qarym-qatynasyn jolǵa qoıdyq. Elimizde 100-den astam ult ókili tatýlyq pen yntymaqtastyqta eńbek etip, bolashaq urpaqtyń ıgiligi úshin aıanbaı qyzmet etýde.
Qazaqstan BUU-nyń tolyqqandy múshesi jáne kóptegen halyqaralyq, aımaqtyq uıymdarǵa belsendi qatysýshy. Biz ıadrolyq qarýdan bas tartyp, búkil álemge beıbitsúıgishtik pen kórshi eldermen dostyq qarym-qatynas ornatý úlgisin kórsettik. Bul tek kórshi memlekettermen ǵana emes, sonymen qatar búkil órkenıetti álemmen úılesimdi baılanystar qurýǵa negiz boldy.
Árbir qazaqstandyq úshin bul mereke – elimizdiń qol jetkizgen tabystary úshin maqtanysh jáne Qazaqstannyń jarqyn bolashaǵy úshin aıanbaı eńbek etýge degen nıettiń merekesi.
Barsha otandastarymdy shyn júrekten quttyqtaımyn! Bizdiń ortaq úıimiz – Qazaqstanymyz gúldene bersin!