Tashkent qalasynda «Ortalyq jáne Ońtústik Azıanyń ózara baılanysy: alǵysharttar, perspektıvalar, geostrategıalyq mańyzy» taqyrybyna arnalǵan halyqaralyq ǵylymı-tájirıbelik konferensıa ótti. Ózbekstan Respýblıkasy Olıı Majlısiniń qoldaýymen uıymdastyrylǵan jıynǵa Qazaqstan Respýblıkasy Parlamenti Senaty tóraǵasynyń orynbasary Asqar Shákirov qatysty, dep habarlaıdy almaty-akshamy.kz Senattyń baspasóz qyzmetine silteme jasap.
Ol óz sózinde ortalyq jáne Ońtústik Azıa elderiniń saýda-ekonomıkalyq jáne ınvestısıalyq yntymaqtastyǵyn arttyrý qajettigin aıtty. Sondaı-aq, Vıse-spıker Ortalyq Azıa óńiriniń aıtarlyqtaı áleýetine erekshe nazar aýdardy. Qazirgi tańda 75 mln-nan astam adamdy qamtıtyn óńirdiń jyldyq jalpy jıyntyq ónimi shamamen 300 mlrd. AQSH dollaryn quraıdy. Al, syrtqy saýda aınalymy 145 mlrd. dollardan asady.
Odan bólek, «Bir beldeý jáne bir jol», Transkaspıı halyqaralyq kólik dálizi, Eýrazıalyq ekonomıkalyq odaq sıaqty aýqymdy jobalar aıasynda qalyptasqan Eýrazıanyń ortalyǵyndaǵy kólik ıntegrasıasyna basa mán berildi.
Qazaqstan Prezıdenti Qasym-Jomart Toqaev bıyl 6 tamyzda ótken Ortalyq Azıa memleketteri basshylarynyń konsýltatıvtik kezdesýinde osy máselege toqtalǵan edi. Qazaqstan Prezıdenti sol kezdesýde Ortalyq Azıada kólik komýnıkasıalaryn damytý aımaq elderiniń jalpy ishki ónimin 15 paıyzǵa ósirýge múmkindik týǵyzatynyn aıtyp, ony asa zor rezerv dep atady.
Sondaı-aq, Vıse-spıker óńirlik qaýipsizdik problematıkasyna, atap aıtqanda, Aýǵanstandaǵy qazirgi jaǵdaıǵa nazar aýdaryp, bul máselede oń jaǵynan tanylǵan kelissóz alańdaryn belsendi paıdalanýǵa shaqyrdy.
«Inklúzıvti memleket ıdeıasynyń ózektiligi joıylǵan joq. Másele áskerı jolmen sheshilmeıdi. Sondyqtan qarsy taraptar kelissózder júrgizý úshin bir ústeldiń basyna otyrýy kerek», – dedi Asqar Shákirov.
Sonymen qatar konferensıa barysynda óńiraralyq ózara is-qımyldy turaqty damytý máseleleri sóz boldy. Ol úshin óńir elderiniń saıası-dıplomatıalyq, saýda-ekonomıkalyq jáne mádenı-gýmanıtarlyq yntymaqtastyǵyn arttyrý, osy baǵyttaǵy tıimdi tetikterdi ázirleýdiń mańyzy zor ekeni aıtyldy.
Jıynǵa qatysýshylar densaýlyq saqtaý jáne bıoqaýipsizdik máselelerin de talqylady. Bul baǵytta bolashaqta bıologıalyq qaýipterdiń aldyn alýǵa jáne qaýipti aýrýlar týraly málimetter almasýǵa yqpal etetin Halyqaralyq bıologıalyq qaýipsizdik jónindegi agenttik qurý týraly Qazaqstannyń bastamasy atap ótildi.