Úsh mektep, alty kópqabatty úı, jedel járdemniń qosalqy stansıasy, psıhıatrıalyq aýrýhana ortalyǵynyń qosymsha aımaqtary, ýchaskelik polısıa beketteri men saýda pavılony. Atalǵan nysandardyń barlyǵy Almaty ákimdiginiń komýnaldyq menshigine aınaldy. Bul týraly Óńirlik komýnıkasıalar qyzmetiniń brıfıńi kezinde qalalyq Memlekettik aktıvter basqarmasynyń basshysy Serik Ibraev málim etti dep habarlaıdy almaty-akshamy.kz
Aıta keterligi, qabyldanǵan 19 obektiniń jalpy quny 12 mıllıard 245 mıllıon teńgeni quraıdy.
«Bular – jańadan salynǵan nysandar. Olardyń ishinde Mamyr-1 shaǵyn aýdanyndaǵy 1200 oryndy jańa mektep ǵımaraty, sondaı-aq №123 jáne 164 mektepterdiń jańa ǵımarattary bar. Sonymen qatar úsh jańa densaýlyq saqtaý nysandary salyndy. Olar – patologoanatomıa búrosy, jedel járdemniń qosalqy stansıasy, psıhıatrıalyq aýrýhana ortalyǵynyń keńeıtilgen aımaqtary. Alty kóppáterli turǵyn úı komýnaldyq turǵyn úı qoryna qosý úshin Turǵyn úı saıasaty basqarmasyna, alty ýchaskelik polısıa pýnkti Almaty Polısıa departamentiniń balansyna, bir saýda pavılony Týrızm basqarmasyna berildi», - dedi Serik Ibraev.
Sonymen qatar, 75 jyljymaıtyn múlik obektisi respýblıkalyq menshikten komýnaldyq menshikke berildi. Bul tizimde Turǵyn úı saıasaty basqarmasyna jekeshelendirý úshin brilgen 53 páter, Almaty temirjol aýrýhanasy, №9 Oqýshylar úıine bir ǵımarat, Jetisý aýdanyndaǵy balalarǵa arnalǵan ortalyq ashýǵa arnalǵan ǵımarat, Polısıa bóliminiń emhanasy, Arnaıy jedel otrádtyń vzvody ornalasatyn bir ǵımarat jáne basqalary bar.
Serik Ibraev jalpy quny 99,8 mıllıon teńge bolatyn úsh nysan syılyq kelisimi boıynsha qabyldanǵanyn aıtty. Bul Almaly aýdanyndaǵy «Arka» óner nysany, sonymen qatar Tólebaev kóshesi 25/18 mekenjaıdaǵy ǵımarat, ol qazir daıyndyq synyptaryn ashý úshin Bilim basqarmasyna bekitilgen.
Al úshinshi nysan - Amangeldi kóshesi, 68A ǵımaraty, onda «Baým toǵaıynyń» jáne ony jasaýshylardyń tarıhyna arnalǵan murajaı ekspozısıasyn qurý josparlanýda. Sonymen qatar gerbarıı qory bolady. Ǵımarat «Medeý» MATP balansyna berildi.