Ázerbaıjan Prezıdenti I. Álıevtiń Qazaqstanǵa memlekettik sapary barysynda Taraz jáne Qazaq qalalary arasynda baýyrlastyq qatynas ornatý jónindegi hattamaǵa qol qoıyldy, dep habarlaıdy aqshamnews.kz
Ázerbaıjannyń qazaqtar úshin erekshe ataýy bar qalasynyń tarıhy týraly Qazaqstannyń Ázerbaıjandaǵy Elshisi Álim Baıel aıtyp berdi.
«Qazaq — Ázerbaıjannyń ásem qalalarynyń biri, ol Grýzıa men Armenıa shekarasyna jaqyn ornalasqan. Biz osy ataýdyń etımologıasyna qatysty shaǵyn zertteý júrgizip, qyzyqty derekterge tap boldyq.
16 ǵasyrdyń basynda ázerbaıjan-parsy bıleýshisi shah Ismaıl men Muhammed Shaıbanı han arasynda soǵys bolǵan. Al Muhammed Shaıbanı qazaq hany Qasymnyń bóleci bolǵandyqtan Qasym han oǵan kómekke jasaq jibergen. Shaıqasta tutqynǵa túsken qazaq jaýyngerlerin shah Ismaıl Kavkazǵa qonystandyrǵan. Sol kezden bastap qazaq batyrlary oryn tepken bul óńir «Qazaq» dep atalyp ketken.
Búginde Ázerbaıjannyń soltústik-batysynda Qazaq aýdany men Qazaq qalasy bar. Qazaq aýdanynda antropologıalyq turǵydan qazaqtarǵa uqsaıtyn adamdardy osy kúnge deıin kezdestirýge bolady. Máselen, ázerbaıjandyq tuńǵysh áskerı ushqysh Farrýh Aǵa Gaıbovtyń sýretine kóz salsańyz jetkilikti. Qazaq aýdany — Ázerbaıjanda qurt ázirlenetin jalǵyz aımaq. Sondaı-aq, mundaǵy turǵyndar jylqyny erekshe jaqsy kóredi jáne ózderiniń aqyndaryn — ashyqtardy qadirleıdi. Ór minezdi bolyp keledi.
Osynyń barlyǵyn eskerip, Qazaq qalasynyń kóne Tarazben baýyrlas bolǵanyn jón sanadyq. Sebebi Taraz — XV ǵasyrda Qazaq handyǵy qurylǵan óńirde ornalasqan. Bul sımvoldyq qadam baýyrlas halyqtardy odan saıyn jaqyndata túsedi.
Jalpy, Ázerbaıjanda ortaq tarıhymyzdy pash etetin kóptegen toponımder bar. Mysaly, Qypshaq jáne Jalaıyr dep atalatyn eldi mekender bar, saqtarmen baılanysty ataýlar kezdesedi. Demek, búgingi strategıalyq áriptestigimiz ben baýyrlastyq baılanysymyz berik tarıhı irgetasqa negizdelgen. Kásibı tarıhshylarymyz kóne dáýirdiń osy qyzyqty betterin zerttese ıgi edi».