Uzyndyǵy 5, bıiktigi 3 metr bolatyn kóliktiń ishinde kereýetter, jýynatyn bólme, ájethana, ystyq sý, gaz peshi jáne tońazytqysh bar
El ishi – óner kenishi. Almaty oblysy Talǵar qalasynyń turǵyny qarapaıym kólikten avtoúı jasap alǵan, dep habarlaıdy Almaty-akshamy.kz «Habar 24» telearnasyna silteme jasap.
Otbasylyq demalysqa arnalǵan mashınada ómir súrýge qajettiniń bári bar. Importtyq úıler kóńilinen shyqpaǵan soń ári bizdiń joldarǵa beıim bolmaǵandyqtan óz qolymen qurastyrýǵa bel býypty.
Qarapaıym pıkaptan jasalǵan bul avtoúı shaǵyn otbasyna ábden laıyq. 5 adamǵa arnalǵan kólikti qysqy maýsymda da paıdalanýǵa bolady. Iaǵnı shatyrdaǵy kúnnen qýat alatyn panel elektr qýaty, jylý men ystyq sýdy qamtamasyz etedi. Al kóliktiń qabyrǵasy qystygúni aıaz ótkizbeıtin arnaıy materıalmen qaptalǵan.
Evgenıı Melnıkov uzaq jyl júk kóligin tizgindep, aýyr tehnıkalardy jóndeýmen aınalysqan. Otbasymen jıi saıahatqa shyǵatyn sheber avtoúı satyp alǵysy kelgenimen, elimizdegi jolǵa shydamdy ári óziniń talǵamyna saı kólik tappaǵan. Sodan keıin armanyndaǵy avtoúıdi ózi qurastyrýǵa kirisipti.
«Eki jylda jasalǵan bul kóliktiń ózge avtoúılerden syrttaı aıyrmashylyǵy joq bolǵanymen, sapasy men tehnıkalyq múmkindigi joǵary», – deıdi sheber.
«Biz tórt jylda bul kólikpen Túrkistan, Taraz, Shymkent jáne Balqashqa baryp qaıttyq. Shonjyǵa jıi baryp turamyz. Qonaq úı izdep, dámhana izdep áýre bolmaımyz. Ózimiz tamaq jasap, osynda túneımiz. Endi osy avtoúımen Eýropaǵa saıahattap qaıtýdy armandaımyn»,-deıdi sheber Evgenıı Melnıkov.
Uzyndyǵy 5, bıiktigi 3 metr bolatyn kóliktiń ishinde kereýetter, jýynatyn bólme, ájethana, ystyq sý, gaz peshi jáne tońazytqysh bar. Osy aýyr salmaqty berik qylý úshin qurylymnyń qabyrǵasy men shatyry aǵashtan oıylyp, kemege arnalǵan jelim paıdalanylǵan. Al ımporttyq avtoúılerdiń qurylymy álsiz, jelimi sapasyz bolady eken.
«Bul avtoúıdi jasaý barysynda ártúrli ıdeıalardy júzege asyrdyq. Úıdi edeninen bastap qurastyrdyq, elektr symdaryn tartyp, salqyndatqysh pen jylý qubyrlaryn júrgizdik. Qolymyz bos kezde aınalysqandyqtan eki jyldaı ýaqyt pen 10 mıllıonnan asa qarajat ketti»,-dedi sheber.
Evgenıı Melnıkov bos otyrmaı, ekinshi jobasyn bastap ketken. Endi ol 3 adamǵa arnalǵan, shaǵyn avtoúı qurastyryp jatyr. Ekinshi joba qarapaıym ári jeńil bolatynyn aıtady.