Nusqaýshy «Saldatsaı» shatqalynan tabyldy
Oqys oqıǵa 1 qańtarda Talǵar aýdanyndaǵy «Aqbulaq» taý-shańǵy kesheninde bolǵan, dep habarlaıdy Almaty-akshamy.kz.
Almaty oblysy TJD baspasóz qyzmetiniń málimetinshe, 2021 jylǵy 1 qańtar kúni saǵat 16:43-te Almaty oblysy TJD púltine Talǵar aýdany «Aqbulaq» taý-shańǵy kesheninde qatty jel men saqtandyrý arqandarynyń úzilýi saldarynan áýe sharymen ushqan kezde áýe sharyndaǵy adamdy taý jaǵyna ushyryp ketkeni týraly habarlama kelip túsken.
«Shaqyrtý ornyna Talǵar q. 2-MÓSB-nen (7 qyzmetker, 2 birlik tehnıka) jáne respýblıkalyq jedel-qutqarý jasaǵynan (7 qyzmetker, 1 birlik tehnıka, 1 kınologıalyq esep) QR TJM bólimsheleriniń kúshteri men quraldary dereý jumyldyryldy. Ushyp ketken shardyń qorjynynda áýe sharlarynda ushý jónindegi nusqaýshy bolyp shyqty»,- delingen TJD habarlamasynda.
Abyroı bolǵanda basqarý jáne ózin-ózi qutqarý daǵdylarynyń arqasynda ol shardy tóbege ózdiginen qondyra bilgen.
«Talǵar qalasynyń mamandandyrylǵan órt sóndirý bóliminiń qyzmetkerleri «Saldatsaı» shatqalynan nusqaýshyny taýyp, ony qaýipsiz jerge jetkizdi. Qaza bolǵandar men zardap shekkender joq»,-delingen habarlamada.
Almaty oblysynyń TJD azamattardan barlyq qaýipsizdik erejelerin saqtaýdy suraıdy.
