Ortalyqta júkti áıelderge últradybystyq jáne bıohımıalyq skrınıng júrgiziledi.
Taldyqorǵan perzenthanasynda qursaqtaǵy sábıdi saqtaý ortalyǵy ashyldy, dep habarlaıdy Almaty-akshamy.kz Densaýlyq saqtaý mınıstrliginiń resmı saıtyna silteme jasap.
Maqsat – týa bitetin damý kemistigin ýaqtyly anyqtaý, olardan bolatyn ólim-jitimniń, balalar arasyndaǵy syrqattanýshylyq pen múgedektiktiń aldyn alý.
Ortalyqta júkti áıelderge últradybystyq jáne bıohımıalyq skrınıng júrgiziledi. Genetıkter men akýsher-gınekologter konsýltasıa beredi. Prenataldyq konsılıýmda uryqtyń damý patologıasy anyqtalǵan kezde bosaný tásili belgilenedi. Sondaı-aq, ortalyqta uryqtyń anyqtalǵan patologıasyn rastaý úshin últradybystyq dıagnostıkanyń ekinshi deńgeıi bar.
«Ortalyqtyń negizgi baǵyty – týa bitetin patologıalarmen kúresý, uryqtyń qalyptasýyna áser etetin jaǵymsyz faktorlardy joıý, týa bitetin aqaýlar men hromosomalyq aýytqýlardy anyqtaý kezinde júktilikti jalǵastyrý máselesi, jańa týǵan nárestege qajetti medısınalyq kómekti ýaqtyly kórsetý. Genetıka bóliminde hromosomalyq aýytqýlarǵa prenataldyq bıohımıalyq skrınıng jáne tuqym qýalaıtyn metabolıkalyq aýrýlarǵa neonataldyq skrınıng júrgiziledi», - dedi Jetisý oblysy Densaýlyq saqtaý basqarmasy basshysynyń orynbasary Áıgerim Lebaeva.
Patologıa anyqtalǵan jaǵdaıda júktilikti odan ári jalǵastyrý nemese toqtatý tásili týraly máselelerdi sheshý úshin uryq patologıasynyń sıpatyna baılanysty kóp beıindi komısıa uıymdastyrylady. Komısıanyń otyrysynda otbasyna anyqtalǵan aýrýdyń barlyq saldary, júktilikti úzbeý týraly sheshim qabyldanǵan kezde balanyń ómirine boljam jáne múgedektik dárejesi túsindiriledi.
Bolashaqta ortalyqta uryqtyń ınvazıvtik prenataldyq dıagnostıkasyn júrgizý josparlanyp otyr. Bul – «Hromosomalyq patologıa» dıagnozynyń sońǵy kezeńi bolyp tabylady.