Ortalyq 1000 kórermenge arnalǵan.
«Óner ortalyǵynyń» saltanatty ashylýyna QR Mádenıet jáne aqparat mınıstri Aıda Balaeva jáne komısıa músheleri, belgili qoǵam qaıratkerleri, óńirlerden kelgen delegasıalar, oblystyń zıaly qaýymy, eńbek ardagerleri, qoǵamdyq uıymdar ókilderi qatysty, dep habarlaıdy Almaty-akshamy.kz
1000 kelýshige arnalǵan ortalyqtyń irgetasy 2022 jyldyń qyrkúıek aıynda qalandy. Quny 3,7 mlrd. teńgeni quraıtyn záýlim ǵımaratta sımfonıalyq, estradalyq jáne ulttyq óner baǵytyndaǵy konserttik baǵdarlamalar, túrli formattaǵy qoǵamdyq is-sharalar ótkiziledi.
Oblys ákimi Nurlybek Nálibaev qyzylordalyqtardy jańa nysannyń ashylýymen quttyqtady.
"Memleket basshysy Qasym-Jomart Kemeluly "Ult mádenıeti – halyq ómiriniń aınasy. Elimizdiń rýhanı damýy ulttyq rýhqa tikeleı baılanysty. Azamattarymyzdyń rýhy árqashan bıik bolýy úshin mádenıetimizge, ıaǵnı rýhanıatymyzǵa basa mán bergenimiz jón" degen bolatyn. Syr óńiri – shejire tunǵan, halyqtyń asyl muralary saqtalǵan altyn kómbeli meken, qazaq teatrynyń alǵashqy qazyǵy qaǵylǵan jer. Aımaǵymyzdyń kıeli sahnasynan mádenıet maıtalmandary men óner tarlandary túledi. Qyzylordada osyndaı óner ordasyna qajettilik zaman úderisteri men kórermen talǵamyna sáıkes týyndady. Az ǵana ýaqyttyń ishinde qurysh qoldy qurylysshylarymyzdyń kásibı sheberligi arqasynda kóz aldaryńyzda sáni men sáýleti kelisken "Óner ortalyǵy" boı kóterdi. Ǵımarattyń saltanatty ashylýyn áıel-analarymyzdyń qurmetine, Syr sulýlarynyń merekesine arnaýdamyz. "Óner ortalyǵy" elimizdiń rýhanı qazynasyn toltyrýǵa, mádenıeti men ónerin asqaqtatýǵa qyzmet ete bersin!", – dedi aımaq basshysy.