Ákimniń aıtýynsha, bul jerdiń qazynasyna da, sapasyna da saıajaı tóraıymy jaýapty
Aýyz sý mashaqatyn jazda ǵana kórýden mezi bolǵan Almaty oblysyndaǵy «Fınansıst» saıajaıanyń jurty narazylyqqa shyqty, dep habarlaıdy Almaty-akshamy.kz Almaty.tv-ge silteme jasap.
İle aýdanyndaǵy «Fınansıst» saıajaıynda 215 ýchaske bar. Búginde 60 otbasy ómir súrip jatyr. Jurttyń aıtýynsha, aıazdy kúnder taıaǵan shaqta aýyz sýǵa zar bolady.
«10 jyldan asty osy jerde turamyn. Sý máselesi óte qıyn. Jazda sýymyz bolady. Qysta bolmaıdy. 6-7 aı toqtaıdy. 7 aı 1 km jerden arbamen tasyp ishemiz», – dedi saıajaı turǵyny Baqytgúl Berdibaeva.
«Úıde eshkim bolmaı qalsa, kórshi balalarǵa aıtamyn. Solar kómektesip, ákelip tastaıdy. Halyq, bala-shaǵa bar kún kórip otyrmyz», – dedi saıajaı turǵyny Ásıa Ospanova.
Turǵyndardy kúre jol máselesi de tolǵandyrady. Olardyń aıtýynsha, júrginshiler jolyn eleıtin júrgizýshi joq. Ásirese túngi ýaqytta joldaǵy adamdy kórmeıtin kórinedi.
«Joldyń arǵy jaǵynan túsedi. Jaıaý júrginshi jolynan ótý úshin eshqandaı mashına toqtamaıdy. Birinshi ótkende «sıgnal» beredi. Ekinshi ret aıqaılap ursyp ótedi. Az bolsa, bir-birimen jarysady. 5 kún buryn adamdy qaǵyp, búgin janazasyn shyǵaryp jatyr. Balalar sabaqqa barady, alańdaımyz», – dedi saıajaı turǵyny Aıdar Qashqynbaev.
«Fınansıst» - Qaraoı aýyldyq okrýginiń quramyndaǵy 20 saıajaıdyń biri. Sondyqtan ondaǵy jurt ýájin okrýg ákimine aıtyp, qos máseleni de sheshim tapqanyn talap etti. Saıajaı turǵyndary «kúre joldyń boıyna jaryq ornatsa» eken deıdi.
«Bul jer eldi mekenge jatpaıdy. Sondyqtan jaryq ornatylmaǵan. Suranys jasap kóremiz joǵary jaqqa. Bul kisiler úkimetten kómek surap jatyr. Úkimet tarapynan zań boıynsha saıajaılarǵa qarajat bólinbeıdi», – dedi Qaraoı aýyldyq okrýginiń ákimi Aıdos Tajanov.
Okrýg basshysy sý máselesin turǵyndardyń ózi sheshý keregin aıtty. Sebebi 60 otbasy turyp jatqan jerde «aýyl» statýsy joq. Ákimniń aıtýynsha, bul jerdiń qazynasyna da, sapasyna da saıajaı tóraıymy jaýapty.
«Men olarǵa esep beremin. Únemi jınalǵan aqshanyń qaıda ketip jatqanyn aıtyp otyramyn. Sýǵa qatysty aıtar bolsam, buǵan deıin bári jabylyp jatyp qubyr salý máselesin kóterdi. Alaıda onyń qunyn eseptegende shashymyz jetpeıtin soma shyqty. Sodan bári toqtady da qaldy», – dedi «Fınansıst» saıajaıy qaýymdastyǵynyń tóraıymy Lúbov Strelına.
Aıta ketsek, saıajaıdaǵy sý máselesi sheshilý úshin turǵyndar 20 mıllıon teńgeniń tóńireginde qarajat jınaýy tıis eken. Biraq oǵan arnaıy qarjy bólinbeıdi.