Óskeleń urpaqtyń júreginde Otanǵa degen súıispenshilik bıik bolýǵa tıis. Almaty qalasyndaǵy «Kaspıı» kolejiniń «Jas búrkit» áskerı-patrıottyq qozǵalysynyń 300-ge jýyq stýdentine Ulttyq ulannyń Keńes Odaǵynyń Batyry, gvardıa polkovnıgi Baýyrjan Momyshuly atyndaǵy 5571 áskerı bóliminde «Ashyq esik kúni» ótti, dep habarlaıdy almaty-akshamy.kz.
Jastar áýeli áskerı bólimniń aýmaǵyna kirip, saptyq alańǵa sapqa turǵyzyldy. Sodan keıin radıasıalyq hımıalyq bıologıalyq qorǵanys múlikterimen jaqyn tanysyp, olardy kıý tártibin úırenip, qorǵanys quralyn jyldam kıý boıynsha kishigirim jarys ta uıymdastyryldy. Jaqsy nátıje kórsetken stýdentterge syılyqtar tabystaldy.
Stýdentterge qyzmettik ıtterdi paıdalana otyryp kórsetilgen sabaq qatty unady. Kınologıalyq qyzmet mamandary qyzmettik ıttermen qylmyskerdi ustaý is-qımylyn kórsetken bolatyn.
İs-shara sońynda bóliminiń mádenı-demalys ortalyǵynda «Uly dala ulandary» derekti fılmi kórsetildi.
«Jas búrkit» áskerı-patrıottyq qozǵalysynyń stýdenti Janar Qaırat:
«Bizge áskerde ózińdi qalaı durys ustaý kerektigin, qarý-jaraqty durys qoldaný tártibin jáne áskerı tehnıkalardy kórsetti, ne úshin qajettigin túsindirdi. Kazarmamen tanystyrdy. Ár sarbazdyń oryndyqtaryn, olardyń nómirlengenin, jatyn tósekterin kórdik. Qyzmettik ıtterdiń pármender boıynsha jattyǵýlardy eki etpǵı oryndaýyn tamashaladyq. Maǵan áskerı orkestrdiń oryndaǵan patrıottyq ánderi erekshe áser etti. Boıymdy maqtanysh sezimi kernedi», – deıdi.