Bolgarıa astanasy Sofıa qalasynda bokstan halyqaralyq týrnır ótip jatyr.
Jarystyń kezekti kúni shırek fınaldyq jekpe-jekter ótti. Biraq Qońqabaev ózbekstandyq Bahadúr Jalolovpen kezdesýden bas tartty, dep habarlaıdy Almaty-akshamy.kz.
Boks jankúıerleri asa aýyr salmaqtaǵy qos myqtynyń kezdesýin asyǵa kútken. Biraq, Qamshybek belgisiz sebeptermen sharshy alańǵa shyqpady.
Sáıkesinshe, ózbek boksshysy avtomatty túrde jartylaı fınalǵa ótti. Budan bólek, taǵy qos sportshymyz shırek fınalda ózbekstandyq qarsylastaryna ese jiberdi. Orta salmaqtaǵy Temirhan Tezek Behzod Hamıdovtan jeńilse, aýyr salmaqtaǵy Bekzat Tanatar Shohjahon Abdýllaevqa jol berdi. Jeńil salmaqtaǵy jerlesimiz Ernur Qaırat ta grýzıalyq boksshydan utylyp, jarys jolynan shyǵyp qaldy. Al, uzaq úzilisten keıin áýesqoı boksqa qaıta oralǵan Bekzat Nurdáýletov óz babynda ekenin dáleldep, alǵashqy jekpe-jeginde jeńiske jetti. Aıta ketetini, ol Tokıo Olımpıadasynan keıin, ıaǵnı, araǵa 1 jarym jyl salyp judyryqtasyp tur.
Sofıa qalasyndaǵy Strandja kýbogynyń jalpy qorytyndysy 26 aqpanda belgili bolady.