Bıylǵy kúzgi áskerge shaqyrtý naýqanynyń aıasynda Almatydan Otan aldyndaǵy boryshyn óteýge 17 sportshy attandy. Olardyń arasynda halyqaralyq dárejedegi sport sheberleri de bar. Sporttaǵy jetistikterine qaramastan, olar birden áskerı boryshyn óteý týraly sheshim qabyldap, ózderiniń azamattyq paryzdaryn oryndaýǵa daıyn ekendikterin kórsetti.
Mundaı jas sarbazdardyń qatarynda Vıktor Drýzın men Dinmuhamed Omarov bar. Vıktor – sınhrondy júzýden halyqaralyq dárejedegi sport sheberi, al Dinmuhamed – grek-rım kúresinen sport sheberi. Bul jastar sportta bıik shyńdardy baǵyndyryp qana qoımaı, óz úlgisimen shynaıy patrıotızm men azamattyq boryshqa adaldyqtyń jarqyn mysalyn kórsetip otyr.
Vıktor Drýzın – Qazaqstan chempıonatynyń jeńimpazy jáne Kanadanyń álem kýbogy kezeńiniń ıegeri. Sonymen qatar ol Qytaı, Parıj jáne Býdapeshttegi álem kýbogy kezeńderinde júldeli oryndarǵa ıe bolǵan. Sporttyq jetistikterimen el maqtanyshyna aınalǵan Vıktor áskerı qyzmetti er azamat úshin mańyzdy ómirlik kezeń dep sanaıdy.
Dinmuhamed Omarov – grek-rım kúresinen Qazaqstan chempıony jáne halyqaralyq týrnırlerdiń jeńimpazy. Bıyl Ispanıada ótken halyqaralyq týrnırde top jaryp, óziniń joǵary deńgeıdegi daıyndyǵyn dáleldedi. Dinmuhamed áskerı qyzmetti óz otbasynyń dástúri retinde erekshe qurmetteıdi. Onyń týǵan inisi Temirtaýda áskerı boryshyn ótep jatyr, al ákesi de kezinde Otan qorǵaý sapynda bolǵan.
– Er azamat áskerı bilim men daǵdyǵa ıe bolýy kerek. Bul ár qazaq jigitiniń qalypty ári mańyzdy kezeńi, – deıdi Dinmuhamed.
Almaty árdaıym jas sportshylardyń patrıottyq sezimin kórsetetin jarqyn úlgi bolyp keledi. 2016 jyly Rıo-de-Janeıro Olımpıadasynyń eki dúrkin chempıondary – aýyr atlet Nıdjat Rahımov pen júzýshi Dmıtrıı Balandın ásker qataryna shaqyrylǵan bolatyn. Al 2023 jyly bokstan álem chempıony Sanjar Táshkenbaı da áskerı boryshyn ótep, bolashaq sarbazdarǵa úlgi boldy.
Bul mysaldar jańa býyn sarbazdaryn shabyttandyryp, olardyń patrıottyq sezimin nyǵaıta túsedi.
Eske salaıyq, kúzgi áskerge shaqyrý naýqany jeltoqsan aıynyń sońyna deıin jalǵasady. Bul naýqan barysynda Almatydan 18-27 jas aralyǵyndaǵy, densaýlyǵy jaramdy, keıinge shegerý quqyǵy joq myńnan astam jas jigit áskerı boryshyn óteýge attanady.