Ústemaqy biliktiligine baılanysty kategorıa úshin qosylady.
Bul jańashyldyqtar 2023 jyldan bastap kúshine enedi, dep habarlaıdy Almaty-akshamy.kz Mádenıet jáne sport mınıstri Asqat Oralovtyń sózine silteme jasap.
Mektep-ınternattyń jattyqtyrýshy-oqytýshylaryna kategorıa úshin biliktiligine qaraı 6 myńnan 22 myń teńgege deıin jańa ústemaqy tólenedi.
Mınıstrdiń aıtýynsha, sport mektepteriniń muǵalimderi men jattyqtyrýshylarynyń aptadaǵy oqý júktemesin 24-ten18 saǵatqa deıin tómendetý josparlanyp otyr.
«Memleket basshysy balalar sportyn damytýǵa jáne pedagog mamandyǵynyń mártebesin arttyrýǵa erekshe kóńil bóledi. Biz aldaǵy ýaqytta jattyqtyrýshy-oqytýshylarǵa topqa jetekshilik jasaǵany jáne sportshyny joǵary sporttyq uıymdarǵa bergeni, sonymen qatar sporttyq ataqtar úshin ústemaqynyń jańa túrlerin engizýdi josparlap otyrmyz. Sala qyzmetkerlerin áleýmettik qoldaý boıynsha jumystar da nazardan tys qalmaıdy. Biz osy baǵyttaǵy mindetterdi tıisti deńgeıde oryndaýdy aldaǵy ýaqytta da jalǵastyratyn bolamyz», - dep sendirdi Oralov.
Ol dene shynyqtyrý jáne sport salasyndaǵy qoldanystaǵy normatıvtik-quqyqtyq baza talaptarǵa tolyq sáıkes kelmeıtinin jáne salanyń naqty qajettilikterin eskermeıtinin aıtty. Sondyqtan mınıstrlik zańǵa túzetýler engizý qajet dep sheshken.