Úndistannyń Penjab jáne Harıan shtaattarynyń joǵarǵy soty dárigerlerge jazý qoltańbasyn jaqsartýdy mindettedi.
Óıtkeni, memlekettik dárigerdiń sot-medısına tujyrymdamasyn eshkim oqı almaǵan, - dep habarlaıdy Aqshamnews.kz.
Sot jetekshisi Jasgýrprıt Sıngh Pýrı anyq ta qanyq jazylǵan medısınalyq resepti negizgi quqyqqqa jatatynyn málimdedi. Iaǵnı, pasıent óziniń qaýipsizdigi úshin dárigerdiń ne jazǵanyn bilýge quqyly. Bul máseleni aldaǵy ýaqytta, dáliregi, eki jyl ishinde sıfrly reseptige kóshý arqyly sheshýi múmkin. Oǵan deıin dárigerler reseptini anyq ta qanyq etip jazýǵa mindetti.
Dese de Úndi medısına qaýymdastyǵynyń prezıdenti Dılıp Bhanýshalı dárigerdiń qabyldaýyna kelgen pasıentterdiń kóptiginen dárigerler jazýyn túsinikti etip jazyp otyrýǵa ýaqyty tapshy ekenin alǵa tartty. Úndistanda mundaı jaǵdaı alǵash ret emes, Odısh jáne Allahaba sottary da buryn dárigerlerdiń jazý qoltańbasyn qatań synǵa alǵan bolatyn. Kúlli álem boıynsha dárigerdiń osyndaı salǵyrttyǵynan, ıaǵnı, reseptini túsinikti etip jazbaýynan myńdaǵan naýqas baqılyq bolǵan eken. 1999 jyly Amerıka qurama shtattarynda jarıalanǵan esepte keltirilgen derekke sáıkes jyl saıyn dárigerdiń túsiniksiz qoltańbasynan 7000 adam qaıtys bolady.